Supreme Court Judge in Mizoram a rawn tlawh

Supreme Court Judge leh National Legal Services Authority (NALSA) Executive Chairman ni bawk Justice Uday Umesh Lalit chuan Zirtawpni khan zankhat riak turin Aizawl a rawn thleng a, Reiek khua leh Rawpuichhip khua te a tlawh.

Zirtawpni-a Aizawl a rawn thlen hnuah Justice Uday Umesh Lalit hian Reiek khua tlawh nghalin Convention Hall kawt-a Cleanliness Drive-cum-Legal Awaremess Campaign kharna neih chu a hmanpui nghal a, Justice Uday Umesh Lalit chuan Mizoram a rawn thlen tirh phat atanga a mit la em em tu chu faina kawnga Mizoram hlawhtlinna a ni tih sawiin, kawng dung te fai a tih thu a sawi a, mipui hmel hmuh a nuamin mipuite khawsak phung pawh a felfai hle niin a sawi a ni. Mipuite mizia leh rilru put hmang a dik avangin faina kawngah hian Mizoram chuan tun aiin hma a la sawn ngei a rin thu a sawi a, rorelna dik mitin hmaah chhawpchhuah a nih theihna tura a puanzar hna Mizoram State Legal Services Authority(MSLSA) in a lo thawh tawh leh thawh mek chu a tha hle nia a hria thu a sawi bawk.

Hemi hnu Inrinni khan Rawpuichhip khuaa tlawh lehin dan leh hrai chungchanga inhrilhhriatna, Legal Awareness Campaign neih chu a hmanpui a, Justice Uday Umesh Lalit chuan a thlawna Dan chungchanga inpuihna, Legal Ad dawn chu Ram Danpui-in khua leh tuite dikna leh chanvo a pek Constitutional Right a nih thu a sawi a, hei hi mitin hnena thleng phak ngei tur a ni, a ti a. Hemi kawngah hian Legal Services Authority te hi an pawimawh a, hetiang Campaign kaltlang hian mipuiten Dan hnuaia an dikna leh chanvo dik dak an hre thei a ni, a ti. Supreme Court Judge chuan Central sawrkar leh state sawrkar ten ruahmanna an siamah te hamthatna dawngtu turin an dawng ngei em tih te, hemi kawng ah harsatna an nei em tih en leh finfiahte pawh NALSA huang chhungah a tel thu a sawi lang bawk a ni.

Justice Uday Umesh Lalit hi Ashok Kumar Jain, Member Secretary, National Legal Services Authority leh Puneet Sehgal, Director, National Legal Services Authority ten an rawn tawiawm a ni.