ASF vanga Vawk thi awm loh ni awm ve leh tawh

Kumin March 21-a Mizoram-a Vawk natna, African Swine Fever (ASF) hri leng hmuh a nih atanga a vawikhatna atan Zirtawpni khan Mizoram-ah ASF vanga Vawk thi a awm lo.

Mizoram-ah Vawk pul hri, ASF a leng tih hi kumin March ni 21 khan finfiah a ni a, Lunglei District-a Bangladesh ramri hnaih a awm Lungsen khua a Vawk tam tak thi chu ASF vei an ni tih finfiah a ni a, Lungsen khuaah hian Vawk 757 a thi hman a. Hemi hnu hian hmun dangah darh zau zelin District 11-a Khua leh Veng 271-ah a darh tawh a. Vawk thi pawh 29,694 tling tawhin hri leng darh zel tur venna atan Vawk 10,380 suat a ni tawh bawk. Vawk thi hi a ni telin a pun chhoh hnuah October thla chho atang khan a tlem tan a, Zirtawpni khan ASF hri leng hmuh a nih hnua a vawikhatna atan Vawk thi a awmlo a, Inrinni leh nimin, Pathianni khan hri avanga thi Vawk pahnih ve ve a awm thung a ni.

AH &Vety Department hotute chuan Vawk pulhri avanga Vawk thi hi tlem chho telh telh mahse ASF hri leng hi a reh tawh anga ngaih theih a la ni lo niin an sawi a. Hri leng dinhmun erawh chu a ziaawm chhoh zel an beisei thu leh Thlasik chhunga thunun hman beisei a ni tih an sawi a. Kum thum 2013, 2016 leh 2018 khan Porcine Reproductive and Respiratory Syndrome (PRRS) vangin Mizoram-ah Vawk sing chuang a thi ni a hriat a ni a, chu ai chuan ASF hian hun reilote chhungin Vawk a suat hnem zawk a ni.

Hetihlai hian Lunglei District-a Tipera-ghat khua a September thla chawhnu lama Kel 50 vel thi leh damlo sample an lak chu National Institute of Veterinary Epidemiology and Disease Informatics (NIVEDI), Bengaluru-ah thawn a ni a. Tunhnai khan result chhuakin rin-hlelh ang ngeiin Kel natna chi khat 'Goat Pox' vanga thi an ni tih finfiah a ni bawk.