Mizoram-ah hri kai hmuh tlahniam hret hret

Mizoram-ah ni khat-a COVID-19 hri kai hmuhchhuah zat a tlahniam ve hret hret zel a, Inrinni khan Sample 4069 enfiah niin heng te atang hian hri kai mi 453 hmuhchhuah niin Sample enfiah atanga za zela 11.13 te chuan hri an kai a ni.

Inrinni khan ZMC-a RT-PCR Laboratory-ah Sample 754 enfiah niin Aizawl District-a Sample lak vek an ni a, heng atang hian hri kai mi 96 hmuh niin Veng leh khua 35 atanga hri kai hmuh te an ni a, veng mal-a hri kai mi 5 aia tam hmuhna Veng 5 a awm bawk a ni. Hei bakah hian Fluorescent Immunoassay Test hmangin Aizawl-ah Sample 103 enfiah ni bawkin heng atang hian hri kai mi 3 hmuh an ni bawk a, an vai hian Aizawl khawpui chhung ami te vek an ni bawk. 

District hrang hrang 10-a TrueNat Laboratory-ah Inrinni khan Sample 370 enfiah ni bawkin heng atang hian hri kai mi 49 hmuh an ni bawk a, an zinga 25 te chu Lunglei District-a hri kai hmuhchhuah te niin Champhai District-ah 8, Mamit District-ah 5, Kolasib leh Saitual District-ah 3 ve ve, Aizawl District-ah 2 leh Serchhip, Lawngtlai leh Khawzawl District-ah pakhat theuh an ni.

Heng bakah hian Rapid Antigen Test hmangin Sample 2842 enfiah ni bawkin heng atang hian hri kai mi 305 hmuh an ni bawk a, an zinga 151 te chu Aizawl District ami te niin Lunglei District-ah 36, Serchhip District-ah 29, Hnahthial District-ah 19, Lawngtlai District-ah 15, Saitual District-ah 14, Champhai District-ah 13, Mamit District-ah 12, Kolasib District-ah 10 leh Khawzawl District-ah 6 te an ni.

Inrinni khan Mizoram-ah hri kai mi 515 te enkawl dam niin nimin khan tlai dar 5:00 thlengin mi 531 te enkawl dam an ni leh bawk a, heti hian nimin tlai thleng khan Mizoram-a hri kai hmuhchhuah chu 1,24,992 niin an zinga 1,19,096 te chu enkawl dam an ni tawh a, hri kai hmuh atanga za zela 95.28 te enkawl dam ni tawhin hri kai enkawllai 5448 an la awm mek a ni. Hetihlai hian Mizoram-a hri kai hmuhchhuah zingah nimin tlai thleng khan mi 449 an boral tawh a, Zirtawpni zan khan hri kai zingah mi pahnih boral belh lehin Inrinni khan mi pakhat a boral leh bakah nimin khan hri kai boral mi pahnih an awm leh bawk a ni.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man