Status Quo puan sut leh turin huntiam pe

JAC on Inner Line Reserved Forest Demand chuan Mizoram leh Assam ramri-a Status Quo vawng thaa ramri hrula hmalakna hrang hrang titawp tura thupek tihchhuah tawh chu sut turin Mizoram Chief Secretary Dr. Renu Sharma hnenah thutawp (Ultimatum) thehlutin, thupek sut a nih loh chuan a tawp thlenga dodal an tum thu an sawi.

November 5, 2021 khan Mizoram Chief Secretary Dr. Renu Sharma leh Home Department te'n Ministry of Home Affairs (MHA) atanga lehkha an hmuh angin, Mamit leh Kolasib District Deputy Commissioner te chu ramri hrulah hmalakna chawlhsana Status Quo vawng tha turin a hriattir niin nimin-a thuthar thehdarhtute an kawmnaah JAC hruaitute chuan an sawi a. “Sawrkar laipui Ministry of Home Affairs in hleih nei taka ro a rel leh, Mizoram bakah Mizo mipuite zahna nei miah lova thil an ti hi kan duh lo takzet a. He Order hi darkar 72 chhunga kan ngenna hmanga thupek sut a nih loh chuan a tawp thlengin kan dodal dawn a ni,” tiin JAC Chairman Lianzuala chuan a sawi a ni.

Mizoram Home Minister Lalchamliana'n ramri hrula Status Quo vawng tha tura thupek tihchhuah a hriatpui ve loh chungchang sawiin Lianzuala chuan, Home Minister in ka hriat pui lo a tih hi a hriatpui lo tak zet a nih chuan thupek chu cancel leh a, procedure pangngaia Mizoram in Transaction of Business Rules a neih kalphung chuan siamthat turah an ngaih laiin, tun thlenga siamthat a ni lo chu an zawhna a nih thu a sawi a. “Home Minister hi an rawn ve lo a, File leh lehkha pawh hi tun thlengin a la hmu lo niin kan hria. Chief Secretary pawhin Home Minister rawn lova thu a kaltlangpui a nih chuan chu chu thil dik a ni lo a. Home Minister hriat loha an ti anih phei chuan a tha lo lehzual. MHA hian Status Quo vawnthat tur a ni tiin lehkha an rawn thawn thin em tih hi kan hre lo,” Lianzuala chuan a ti a. Assam lamin hma an lak zel laia Mizoram sawrkarin a ram chhung ngeia Status Quo vawng thaa engmah hna thawk tawh lo tura thupek tihchhuah a ni chu tha an tih loh thu a sawi bawk.

JAC General Secretary Raphael Lalrinmawia chuan tun tuma Status Quo vawng tha tura thupek tihchhuah chu Mizoram tan a pawi thu sawiin, “A bik takin sawrkar lam thil khawih chauh nise chu a hriatthiam theih a. Aitlang, Buarchep leh Thinghlun vela loneitute pawh hna thawk thei lovin an dang niin kan hria a. Mimal eizawngte pawh chawlh tir tura hmalakna awm hi a pawi em em a ni,” a ti a. “Chief Secretary chu eng mi pawh ni se, Mizoram Chief Secretary a nih angin Mizoram tan, Mizo hnam tan hna thawk se. Mizoram leh Mizo tan pawi an sawi a, hna an thawk a nih erawh chuan JAC hian tupawh nise kan do zel dawn a ni,” a ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man