Chanchin thar thenkhat :

Minister in lawmpuina hlan

Agriculture Minister C. Lalrinsanga chuan thu leh hla (Literature) lamah ah a thawhhlawk avanga India Civil mite chawimawina sang Padma Shri dawngtu C. Kamlova lawmpuina atan nimin khan a Pisa-ah thingpui ruai a buatsaih sak a. He hunah hian Agriculture Minister chuan C. Kamlova’n Padma Shri a dawnna chu a danglam bik riau nia hriat thu sawiin, Hindi lamah a thiamna te, thu leh hlaa a kutchhuak te chu a chhuanawm in a ropui a, Zofate zingah chuan Hindi lama kan mi chhuanvawr a ni, a ti. He hunah hian Agriculture Development Board Vice Chairman H. Biakzaua pawhin C. Kamlova chu Lai zinga Padma Shri dawng hmasa ber niaawm a hriat thu sawiin, tawng lamah talen a nei hausa te chu a ngaihsan-awm a tih thu a sawi bawk. Minister leh MLA te hian C. Kamlova hi lawmpuina thuziak leh thilpek a hlan a ni.

Rul chanchin zirtute tirlut

Tunhnaiah East Tuipui Bial-a Khuangthing khua ah Rul chuk avanga mi pahnih an boral avang leh mi 20 lai Rul in a chuk tawh bakah an khaw chhungah Chawngkawr an la hmuh reng avangin Bialtu MLA leh Bamboo Link Road Vice Chairman Ramthanmawia chuan nimin khan he khua ah hian Rul lam chanchin zirtu mithiam bik te chu a tirlut a, heng mithiam te hian Vawiin atang hian khawchhung-a Chawngkawr awm te hi man tumin an veh dawn nia thudawn a ni bawk.

MUP ten Faina hnatlang nei

Lunglei khawpui chhung Faina atana hma-lakna kal zelah nimin khan Lunglei khawpui-a Mizoram Upa Pawl (MUP) Unit hrang hrangte chuan Faina hnatlangpui an nei a, he hnatlang hi MUP Unit 11 ten neiin a rualin anmahni huam-chhung theuh thenfai hna an thawk a, kawng ba leh hnim samfai hna an thawk bawk a ni. MUP General Hqrs. Lunglei hnuaiah hian Unit 134 awmin member 11100 vel an awm mek nia thu dawn a ni a, kum 100 tling tawh member 11 an awm mek bawk a ni.

BJP in mipui bumna ah ngai

BJP Mizoram Pradesh chuan tunhnaia Sports Minister Robert Romawia Royte in Mizo Hnam Run-a thu a sawi chu mipui bumna ah an ngai tih sawiin, MNF Party chu India ram Political Party te kalhmang leh zahawmna te hre turin an hriattir a. “State Chief Minister mahni duhzawng Chief Secretary dah theilo hian Governor hnenah banna thehluh nghal chiah tihtur a nei,tih hi BJP Mizoram Pradesh chuan kan thurawn duh a ni,” an ti bawk.

MNF in chawimawina hlan

MNF Party chuan nimin khan Aizawl-a Mizo Hnam Run-ah Chhung Inkhawm neiin he hunah hian an Member zinga tunhnaia Padma Shri Award dawngtute pahnih Lalbiakthanga Pachuau leh B.Sangkhumi-te chawimawina Parthi an hlan a. He hunah hian an MNF Vice President Lalthlengliana chuan MNF member zingah chawimawina sang dawng thei pahnih an nei chu a ropui an tih thu a sawi bawk.