Serchhip Sports Stadium hman dan tur la tihfel loh avangin SDSC in Vawiin atangin an enkawl dawn

Serchhip District Sports Committee (SDSC) chuan SDSC Sports Complex-a Sports Stadium hman dan tur chungchangah sawrkar in ruahmanna ala peihfel loh avangin Vawiin, Nov. 1, 2021 atang hian he Sports Stadium enkawl hna hi an thawk tan dawn tih an sawi.


SDSC hruaitute hian Inrinni kalta khan an Chairman K. Tlangthanmawia kaihhruaiin Serchhip Venglai a SDSC Office-a MJA member te kawmin SDSC Sports Complex-a Sports Stadium chungchanga an hmalakna te an sawipui a. He hunah hian SDSC hruaitute chuan SDSC Sports Complex-a Sports Stadium sak hi August 30, 2021-ah peihfel lo taka hawn a ni tih sawiin, a tirah a siamtu UD&PA Department in SDSC kut-ah a hlan nghal mai tura an ngaih laiin sawrkar kalphung angin Sports & Youth Services Department kutah hlan a ni leh ta zawk tih an sawi a. District Sports Committee chu Sports & Youth Service hnuaia Mizoram State Sports Council hnuaia Dan ang thlapa sawrkar in a din a ni tih sawiin, Sports Department hian Serchhip District-a District Sports & Youth Officer nei ve mah se Staff pakhat pawh an awm loh avangin an tan pawh hmalak a harsa nia a lan thu an sawi a ni.

SDSC hruaitute chuan UD&PA Department in S&YS kut-a an hlan hnu hian kalphung mumal awm lovin Sports Stadium hi hman a nih tak thu leh a duh duh lutin Running Track bakah Artificial Turf te pawh duh ang ang hman a ni tih an sawi a, a hma atanga helai hmun lo viltu Chokidar pawh hlawh pek zui a ni lo nia sawiin, hei vang hian mumal taka hman a nih theihna tur leh uluk taka enkawl a nih theihna turin District Sports & Youth Officer hnenah lehkha an thehluh thu leh hei hi chhanna an hmuh mai loh avangin Director, Sports & Youth Services-ah lehkha thehlut lehin October 22, 2021 hmaa a hman dan ruahman fel tura an ngen thu an sawi a. Amaherawh chu sawrkar in helai hmun hman dan chungchangah ‘Kan duang mek’ ti chunga thla khat leh a chanve lai a liam leh tawh avangin sawrkar in ruahmanna siam fel hma chuan a neitu an nih angin helai hmun enkawl hna hi Vawiin atang hian an thawh dawn thu leh a hmang duh pawhin an hnenah dilna thlen tur a nih thu an sawi a ni.

SDSC hruaitute chuan Sports Stadium chungchang hi tunhnai lawk khan Sports Minister hnenah pawh an thlen thu leh ni 30 chhunga tihfel beisei a nih thu bakah Chokidar pawh a hma ami anga ruai chhunzawm tura a tih thu an sawi a, amaherawh chu Chokidar pawh hi an hlawh tur ruahman a nih tak loh avangin September thla hlawh tur chu SDSC sum atanga an lo pek lailawk thu an sawi a. Tunah hian a hmunhma ah cheibawl ngai engemaw zat a awm thu pawh sawiin, heng te hi SDSC hruaitute hian a hmuna an enfiah hnuah a tahtawl-a hmalak an tum thu an sawi a. Tuna a hman dan tur kaihhruaina an siam te pawh a tul anga ennawn zel theih tur a ni tih an sawi bawk. 

He inkawmna ah hian SDSC atangin an Chairman bakah Vice Chairman Zolianmawia, Secretary Vanlalhruaia, Treasurer John Zorammawia leh Fin. Secretary Lalremruata Ralte te pawh an tel a, Sports Complex enkawl zuina tura an ngaih pawimawh hrang hrangte pawh huamzau takin an sawiho nghal bawk a ni.

Comments

Popular News (Last 30 Days)

Serchhip DCSO sawn a ni