Covid vanga thi mi 6 te Ex-Gratia peihfel tawh

Serchhip District chhunga COVID-19 vanga thi chhungte atangin Serchhip DC Office chuan Ex-Gratia dilna 8 dawng tawhin an zinga 6 te chu pek tura peihfel a ni tawh.

Serchhip DC Office atanga thu kan dawn danin sawrkar in ruahmanna a siam anga Covid Death Ex-Gratia dilna hi nimin, Oct. 29, 2021 thleng khan 8 dawn a ni tawh a, heng dilna te hi sawrkar in a ruahman angin bawhzui nghal zel a ni a, dilna lut zinga 6 te chu tihfel ngai ang ang tifelin sum pekchhuah theih tura peihfel a ni tawh a, an zinga mi 3 te chuan sum, Rs. 50,000/- chu an lachhuak tawh nghe nghe tih an sawi bawk.

Serchhip DC Office-a thawktute chuan dilna an dawn zingah hian pakhat chu buaipui mek a ni tih sawiin, hei hi document pawimawh a kim loh avanga dil leh mek a ni tih an sawi a. Dilna lut pakhat erawh he ruahmanna in a huam pawnlam ami a nih avanga hnawl a ni tih sawiin, hei hi CCC-a enkawllai, accident vanga thi a ni tih an sawi a. Hri kai enkawllai pawh nise chhan dang vanga thi a nih chuan he ruahmanna hnuaiah hian Ex-Gratia hi pek theih a ni lo tih an sawi bawk.