Chanchin thar thenkhat :

Sawrkar nen MoU ziak

Mizoram sawrkar School Education Department leh Reckitt & Plan India te chuan nimin khan thawhhona thuthlung (MoU) an ziak a, he MoU-ah hian Mizoram aiawhin School Education Department Secretary Dr. Lalzirmawia Chhangte IAS leh Reckitt & Plan India aiawhin Dr. Komal Goswami, Chief of Party te chuan an hming an ziak a ni. Reckitt & Plan India in a tum ber chu naupangten hrisel taka nun an hman theih nan te, mipui hriselna te, inremchenna kawng ah te, inthlahchhawnna leh mipat hmeichhiatna kawnga inzirtirna a ni. Hei bakah hian naupangte theihna haichhuah kawnga nun kawng dik leh khawtlang inrelbawlna kawnga inhman tir leh tleirawlte nun kawng dik an zawhna kawnga khawtlang tana mi tangkai an nih theih nana inzirtirna te chu a tum ber pakhat niin he project hian North East State paruk te leh naupang nuai hnih te tana hmalak a tum a ni.

CM leh ADB hotu inkawm

Nimin tlai khan Chief Minister Zoramthanga chuan Asian Development Bank-a Senior Health Specialist, Dinesh Arora nen Virtual Meeting an nei a, he hunah hian Mizoram hmasawnna tur atana pawimawh hrang hrang an sawidun a, ADB atanga state tan puihna awm thei hrang hrangte leh hmalak ngai lai te pawh an sawi bawk. Chief Minister hi State Planning Board Vice-Chairman H. Rammawi leh Adviser to Chief Minister (Technical) Er. K. Lalsawmvela bakah Department hotu pawimawh ten an tawiawm a ni.

Chief Secretary in hna zawm

Union Home Ministry in Mizoram Chief Secretary tura a ruat Renu Sharma chuan nimin khan a hna thar zawmin Chief Secretary atana Mizoram sawrkarin ruat lailawk JC. Ramthanga hnen atangin Chief Secretary mawhphurhna hi a la a ni. Renu Sharma hi AGMUT Carde 1988 Batch a ni a, June 2011 atang khan Mizoram ah lo awm tawhin Department hrang hrangte a lo enkawl tawh thin a ni.

Lawngtlai-a Home te tlawh

Lawngtlai District Child Protection Committee (DCPC) Member te chuan nimin khan Lawng-tlai a naupang enkawlna hmun (Child Care Institute) pahnih - Lairam Motherless Home leh Lawngtlai Observation Home (LOH) te tlawhin an dinhmun an enfiah a, Home enkawltute pawhin an mamawh te an lo thlen nghal bawk a ni.

Mamit-ah Training nei tan

Mamit DC Office leh Mizoram Youth Commission buatsaihin nimin khan Mamit-ah COVID-19 Migrant Workers te tana Livelihood Generation Training neih tan a ni a, tun tumah hian mi 20 ten ni 15 chhung Vawk vulh dan zirin mi 40 ten ni 45 chhung Cement Mistiri Training an nei dawn bawk a ni.