Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Serchhip District atanga a hralhna hre sa-a Tomato tharchhuah theih dan tur sawihona neih a ni

Kuthnathawktu ten hralhna tur hre sa a thlai an chin theihna tura hmalak dan sawihona chu nimin khan Serchhip-a Horticulture Department buatsaihin neih a ni a, he hunah hian sawrkar lam hotute leh Serchhip District chhunga thlai chingtute bakah thlai hralhna lam buaipuitu Farm Cart aiawhte pawh an tel a ni.

Serchhip DHO Conference Hall-a he sawihona hun hman hi Serchhip DHO, M. Vanlalzami chuan kaihruaiin Serchhip District chu kan vanneih thu leh kuthnathawktu taima tak tak kan ngah thu a sawi a, nikum a hri leng avanga Total Lockdown kalpui a nih laia Vegetables Supply Chain kalpui a nih lai pawhin Mizoram hmun hrang hrangah thlai tam tak thawnchhuah a nih thu a sawi a. Kuthnathawktu ten thlai chi hrang hrang chingin ei zawng mah se an tharchhuah hralhna lamah harsatna an tawh leh thin thu sawiin, hei vang hian kan thlai chin te a hralhna hre sa a kan chin a pawimawh thu leh chumi atana hmalakna atan chuan he sawihona hi buatsaih a nih thu a sawi bawk.

He sawihona hun rawn hmanpuitu Horticulture Department-a Joint Director T. Vanlaltlana chuan Horticulture Department lam hmingthatna ber pakhat chu thlai tharchhuah ah a nih thu sawiin, kuthnathawktu ten an thlai chin te a hlawm (Cluster)-a Zau khat-a an chin loh chuan Department lam tan hmalak a buaithlak thin thu leh Cluster anga hmalakna hi a theih anga kalpui a nih thu te, tanpuina awm thei ang ang te pawh Cluster hrang hrangah pek thin a ni tih a sawi a. Kuthnathawktute thlai chin chu a ruala tharchhuah vak a nih chuan a hralhna lamah harsatna a awm thin thu leh hei vang hian a inchhawk a tharchhuak thei tura ruahmanna neih a pawimawh thu a sawi. Horticulture Department Joint Director chuan Farm Cart ten Vegetables Supply Chain mumal taka kalpuia Tomato an lei thei ang tih an sawi avangin he sawihona hun hi buatsaih a nih thu a sawi bawk. Tunhnaia Thlasik thlai chingtute thlai chi kui tawh tuilian in a tihchhiat chungchangah District hrang hrangah thlai chi sem zawh a nih tawh thu sawiin, tuilian tuartute hnena pek leh tur chu ngaihtuah that leh a ngai dawn tih a sawi bawk.

Nimin-a he hun hman ah hian Farm Cart atangin an Director Lalnunpuia chuan Vegetables Supply Chain an kalpui dan te tarlangin, State pawn tharchhuah te pawh buaipui thei an nih laiin Mizo tharchhuah kher lei-a hmalak an tum thu leh chu chu an dinchhan pawh a nih thu a sawi a. Mipui ten thlai tharchhuah an lei theih nan kawng thui tak zawh tur a awm thu sawiin, tunah hian Mizo thlai-ah kan intodelh thei a ni tih lantirna atan a bultanna ah Tomato-ah hma an lak thu leh Aizawl khawpui-ah chawlhkar khat ah Tomato quintal 350 vel hralh theih niin tunah hian hmun thum-a thena hmun khat vel chu anmahni buaipui a nih thu a sawi a. Kuthnathawktute ‘Ching rawh u’ an tih chuan an tharchhuah te an lei sak ngei dawn thu a sawi bawk.

Serchhip Agriculture & Horticulture Cooperative Society-a Chairman, PC. Siamliana chuan hetianga hmalakna a awm chu lawmawm a tih thu sawiin, an member te hnena ‘Tomato chu hralhna a awm dawn’ tia an sawi chhawn theih dawn thu a sawi a, hun kal tawh lamah thlai thar hralhna a harsatna an tawh thin ah Horticulture Department in nasa taka an buaipui thin dan te a sawi bawk.

He hunah hian Horticulture Department Serchhip Block-a Block Horticulture Officer Hannah Lalrohlui Betlu chuan thlai chinna kawnga Serchhip District dinhmun tlangpui te sawiin, Serchhip District chhunga khaw 18-ah Cluster anga thlai chinna an kalpui thu leh Cluster 34 awm mekin hei hian hectares 200 vel a huam thu a sawi a. Tomato, Zikhlum leh Bawkbawn chu an chin tlangpui a nih thu leh Changkha, Bean, Brocolli leh Chinese Cabbage te pawh an thlai chin dang langsar zual a nih thu a sawi bawk a ni.

Comments

Chhiar Hlawhte

Book of the Year hlan