Pathianni-ah hri kai 171 hmuh belh leh an ni

Pathianni khan Mizoram-ah Sample enfiah 1076 awmin hri kai mi 171 hmuh an ni a, Sample enfiah atanga za zela 15.90 te chuan COVID-19 hri an kai a ni.

Pathianni khan ZMC-a RT-PCR Laboratory-ah Sample enfiah awm lovin Fluorescent Immunoassay Test hmanga enfiah a awm lo bawk a, District hrang hranga TrueNat Laboratory zingah Mamit-ah Sample 4 enfiah niin hri kai hmuhchhuah an awmlo bawk. Rapid Antigen Test hmangin Siaha, Lawngtlai leh Hnahthial tihloh District dang zawngah Sample 1072 enfiah niin heng atang hian hri kai mi 171 hmuh an ni a, an zinga 57 te chu Aizawl District-a hri kai hmuh te niin Khawzawl District-ah hri kai 54 hmuh an ni a, Khawzawl District-a hri kai hmuh te hi Khawhai khua vek an ni. Lunglei District-ah pawh hri kai mi 23 hmuh an ni a, Champhai District-ah 12, Kolasib District-ah 10 Mamit District-ah 7, Serchhip District-ah 6 leh Saitual District-ah hri kai mi 2 hmuh an ni bawk.

Nimin khan tlai dar 5:00 thlengin Mizoram-ah hri kai mi 476 enkawl dam an awm a, heti hian nimin tlai dar 5:00 thlenga Mizoram-a hri kai hmuhchhuah chu 1,28,775 niin an zinga 1,23,365 te chu enkawl dam an ni tawh a, hri kai hmuhchhuah atanga za zela 95.80 te enkawl dam ni tawhin hri kai enkawllai 4947 an la awm a. Nimin khan hri kai zingah mi pahnih boral lehin nimin tlai thleng khan hri kai zingah mi 463 an boral tawh a ni.