Kumthar Budget Session-ah MLB Bill putluh tum

Human Resources Development (HRD) Board Vice Chairman L. Thangmawia MLA chuan harsatna dang a awm loh chuan kumthar Budget Session-ah Mizo Language Board (MLB) Bill putluh tum a ni tih a sawi.

Nimin zing khan Mizo Grammar Society hruaitute chuan HRD Board Vice Chairman hi a chenna In-ah kawmin Mizo tawng hmasawnna tura Mizoram sawrkar-in Mizo Language Board (MLB) din tura chak taka hma a lak mekna ah lawmthu an hrilh a. He hunah hian L. Thangmawia chuan tuna HRD Board in MLB din tura hma a lakna te chu Chief Minister-in Mizo tawng hmasawnna a ngaih pawimawh avang leh HRD Board hnena hmala tura a tih vang a nih thu a lo hrilh a, harsatna dang a awm loh chuan kumthar Budget Session-ah he MLB Bill hi Education Minister Lalchhandama Ralte chuan Assembly House-ah a putluh hman beisei a nih thu a lo hrilh a. MGS ten hlawh nei lova Zofaten Mizo tawng dik zawk kan neih theih nana an hmalakna te ropui a tih thu leh chhuanawm a tih thu te lo hrilhin, lawmthu a lo hrilh bawk a ni.

MGS hruaitute chuan Mizo tawng chungchanga inhnialna tam tak hi Grammar atanga chinfel theih a nih thu sawiin, hnam humhalh nana Mizo tawng dik a pawimawh zia an sawi a. MBSE hnuaia Mizo Language Committee (MLC) in Mizo tawng ziah dan (3rd Edition) a siam chungchangah rawtna an thlen thu te, MBSE atanga ngenna an dawn bawhzuia pawl 9 atanga pawl 12 inkar Mizo zirlaibu MLC kaihhruaina nena inmillo an zirchian mek thu te an sawi bakah DDK leh AIR-ah Mizo tawng Grammar pawimawhna leh tangkaina lam hawi programme an neih mek thu sawiin, Mizo tawng chungchanga sawrkar hmalakna kawng hrang hrangah MGS in tangkaina an neih chuan theihtawp chhuah an in huam thu an sawi bawk a ni.

He inkawmhona ah hian Mizo tawng hmasawn nan leh hnam inpumkhat nan khawvel hmun hrang hranga cheng Zofate nen biakhmuh-theihna hmanga Mizo tawng inpawlkhawmna (International Webinar) nei turin MGS leh HRD Board ten hmalak tlan nise an ti bawk.

Comments

Popular News (Last 30 Days)

Serchhip DCSO sawn a ni