Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Mizoram-a Nauban vawn-a zirna hmun tur hawn a ni

Mizoram-a Nauban awmte vawnthata an chanchin zirna hmun tur, Mizoram Orchid Centre chu nimin khan Maubuang-ah Rural Development Department changtu Minister Lalruatkima chuan a hawng.

Mizoram Orchid Centre hawnna hunah hian RD Minister chuan Mizoram Orchid Centre chu hun lokal zelah hmun hlu leh pawimawh tak a nih a beisei thu sawiin, Nauban chu a par chu a man a to em avangin Mizoram economy tan thil tangkai, sum lakluh theihna leh mipuite tan eizawnna kawng hawng thei nia a hriat thu a sawi a. Mizoram-a Nauban awmte humhalh kawngah Orchid Centre chu hmun tangkai tak a ni thei dawn tih sawiin, “Keini hian kan ngaihhlut thiam leh kan humhalh a pawimawh a, damdawi siam nana an hman te, Hotel leh In chei nana hman te leh thil danga Nauban an hman te hi engtin nge sum-ah kan chantir thei ang tih ngaituaha rilru kan siam a pawimawh dawnin ka hria,” a ti.

Helai hmunhma atana khawtlang in phal taka ram an pe chu an entawntlak a tih thu Minister chuan sawiin, Aibawk RD Block hnuaia khualzin hip theihna hmun hma engemaw zat awmte leh helai ramngaw tha leh boruak nuam te chu Eco Tourism atan te, Adventure Tourism leh Rural Tourism tan rohlu tha tak sum a chantir theihna a nih avangin eizawnna atana hman tangkai theih dan ngaihtuah a tul thu a sawi bawk.

Mizoram Orchid Centre Maubuang hi Shyama Prasad Mukherjee Rurban Mission (SPMRM) hnuaia cheng nuai 390 senga sak niin satu hi Mizoram Technocrats, Tuikhuahtlang te a ni a. April 2018-ah sak tan niin May 2019 khan sak zawh a ni a, hripui leng avangin tum hnih lai a hawn hun lo ruahman pawh sawn a ni. Mizoram Orchid Centre ah hian Mizoram-a awm Nauban chi hrang hrang lakkhawma, vawnthat a, Tissue culture hmanga tihpun leh an chanchin zir te a tum ber a ni a. Eizawn nana hman tangkai theih dan te pawh zir a ni dawn a ni.

He Centre chhungah ah hian heng zirna tur Laboratory chang-tlung tak awm telin, Tissue Culture tih theihna khawl chi hrang hrang pawh bun a ni a, Staff Quarters, Green House hrang hrang leh Guest House te a awm a. A Implementing Agency hi Rural Development Department niin Zoawi Orchids in an enkawl zui dawn a ni. Orchid Centre a Nauban lakkhawm hi BIOCONE in an buaipui bawk a ni. Mizoram ah hian Nauban chi 350 chuang chhinchhiah a ni tawh a, a then te chu mang thei mai (Threatened leh Rare Species) dinhmun awm mek te niin heng te pawh hi Orchid Centre ah hian sengluha humhalh a tihpun tum a ni.

Aibawk Cluster hi SPMRM hnuaia Mizorama Cluster 4 zinga pakhat niin India ram pum Cluster 300 chuang ah a titha pawl a ni a, Aibawk Cluster-ah hian Maubuang leh a bulhnai khaw 10 dang an awm a ni.

Comments

Chhiar Hlawhte

Book of the Year hlan