Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Mizoram Larsap in Mizoram Upa Pawl hruaitute Raj Bhavan-ah a kawm

Mizoram Governor Dr. Hari Babu Kambhampati chuan nimin khan Mizoram Upa Pawl (MUP) hruaitute chu Raj Bhavan-a lengah sawmin inkawmna an nei.

He inkawmna ah hian MUP hruaitute chuan an pawl dinhmun leh an hmalakna chi hrang hrangte Larsap an hrilhfiah a, Mizoram chhungah Myanmar atangin mi 10000 chuang an rawn tlanchhiat thu sawiin, anni chhawmdawl leh tanpui kawngah hma lak sak tura an ngen bakah sawrkar laipuiin ngaihsak deuh se an duh thu an thlen a. Hei bakah hian Indian Constitution Eight Schedule-a Mizo Tawng telh tura theihtawp chhuah sak turin Larsap hi ngenin, hei hian Mizo thalaite Central Service leh All India Service-ah an luh theih nan bakah kawng hrang hrangah a tangkai dawn tih an sawi a ni. Mizoram chu India hmarchhak kilkhawra awm a nih avangin sawrkar laipuiin a ngaihthah deuh nia an hriat thu pawh MUP chuan sawiin, Mizoram in ngaihsak a hlawh lehzual theih nan hma lak sak turin Larsap chu an ngen bawk a ni.

He hunah hian Larap chuan Mizoram Upa Pawl-in Mizoram leh hnam hmasawnna tur kawng hrang hranga hma an lak thinna chu chhuanawm a tih thu sawiin, ram leh hnam hmasawnna tura sawrkar hmaklakna hrang hrangah te tha taka thawhhopui zelah a sawm a, an tawnhriat hlu tak takte chu thangtharte tana pawimawh leh tangkai a nih avangin sawrkar finchhuah kawngah theihtawp chhuah zel turin a sawm bawk a ni.

Hei bakah hian MUP ten an thu thlen hrang hrang te chu Larsap Dr. Hari Babu Kambhampati chuan a theih ang anga bawhzui sak a tum thu sawiin, Mizoram mai bakah India hmarchhak chu Prime Minister pawhin a ngai pawimawh tih a sawi a, amah mai bakah Union Minister te chu hmarchhak State tlawchhuak vek turin a hrilh tawh a, Union Minister te pawhin hei hi tihhlawhtlin an tum tih a sawi a, Vice President pawhin Mizoram rawn tlawh a tum thu a sawi bawk a ni.

Mizoram Upa Pawl (MUP) hi kum 1957 khan din niin Mizoram chhunga District 8-ah Branch 586 an nei a, tunah hian member 60000 chuang an awm mek a. Mizoram mai bakah Manipur, Meghalaya leh Tripura-ah MUP member engemawzat an awm bawk a ni.

Comments

Chhiar Hlawhte

Book of the Year hlan