Minister hovin Agriculture Department hmalakna thlirho

Agriculture Minister C. Lalrinsanga hovin nimin khan a Pisa-ah Mizoram pum huapa Agriculture Department hnuaia hmasawnna hmalakna kalpui mek te thlirho a ni a. Mizoram-a Agriculture tih hmasawnna tura hmachhawp hrang hrang te pawh sawiho a ni bawk.

He thutkhawm ah hian Agriculture Minister chuan sik leh sa danglam nghawng avangin kan khaw awmdan a lo danglam tak zia te sawiin, Agriculture Department pawhin hei hi en liam mai lova Climate change effect lo awm tur dolet tura Department ang pawh lo inpuahchah a tul thu a sawi a, District tin ten District Agriculture Contingency Plan mumal tak an siam theuh a tul thu a sawilang bawk.

Agriculture Minister chuan Agriculture Department hnuaia Scheme hrang hrang te mumal zawka Convergence kalpui a nih theih nan District Level Co-ordination Committee din anih tawh thu leh District thlan bikah Line Department dang te nen tha zawka thawhhona a awm theihna tura District Level Coordination Committee (Agriculture & I&WR) siam anih thu a sawi a. Mumal zawka District Agriculture Plan siam thuai a tul thu a tarlang bawk.

He hunah hian District Agriculture Officers ten hmasawnna hrang hrang an kalpui dan tarlangin, kumin (2021) hi kum dang aia Fur ruahtui a mumalloh avanga loneitu thenkhat ten a hun taka thlai an chin theih loh avanga buaina an tawh chungchang te leh buh seng laia ruahtui tam lutuk avanga loneitu thenkhat, a bikin Buh chingtuten buaina an tawh chungchang pawh sawiho a ni.

Meeting-ah hian Agriculture Department in Scheme hrang hrang kaltlanga hmasawnna hna an thawh te leh heng Scheme atanga hlawhtlinna an neih te sawiho a ni a. WRC bikah Buh chin zawha thlai dang chin dan tur (Cropping system) chungchang, kumkhat chhunga thlai vawi thum (3) tal thar thei tura hma lak dan te leh Data collection chungchang ah mumal zawk a ruahmanna kalpui dan tur te sawiho a ni bawk.

Nimin a thutkhawm ah hian Agriculture Department-a Secretary J. Hmingthanmawia leh Director Rohmingthanga Colney bakah Officer dangte leh District hrang hrangah DAO te an tel a ni.