Lok Sabha MP in Project nawr kal kawngah theihtawp chhuah turin Mizoram Larsap a ngen

Mizoram Lok Sabha MP C. Lalrosanga chuan nimin khan Raj Bhavan-ah Mizoram Governor Dr. Hari Babu Kambhampati chu kawmin Sawrkar laipui atanga Gross Budgetary Support hnuaiah Project thenkhat hmanhmawhthlak te a awm avangin a nawr kal kawngah theihtawp chhuah turin Governor chu a ngen.

Mizoram Lok Sabha MP in Governor a kawmna ah hian Mizoram State tana thil pawimawh hrang hrangte sawidunin, Lok Sabha MP C. Lalrosanga chuan tunah hian Mizoram project pawimawh tak tak Central Sawrkar-ah a la tangkhang mek tih a sawi a. A bikin DoNER Ministry-ah phei chuan Mizoram sawrkarin project a thehluh te nawrkal ngai tak tak a awm nual tih sawiin, MP a nihna angin vawi tam tak a nawr tawh thu a sawi a. 10% Gross Budgetary Support of different Ministries of GOI for the North Eastern States hnuaiah pawisa tam tham tak dah hran a nih avangin Mizoram sawrkar project te hi la pawm hun a awm dawn tih sawiin, amaherawhchu, project thenkhat hmanhmawh thlak te a awm avangin a nawr kal kawngah Governor chu theihtawp chhuah turin a ngen a ni.

Lok Sabha MP chuan Assam Rifles ten insawnchhuahna tur hmunhma Zokhawsang ah an neih fel dim diam tawh thu a sawi a. Insawnchhuah kawngah Assam Rifles an khawmuang chu tha lo a tih thu sawiin, an insawnchhuah hma Mizo mipuiin an duh thu leh Aizawl khawpui chep lutuk sawi fel nan pawh a thlakhlelhawm tawh takzet tih a sawi a. He thilah hian Governor chu inrawlh tura ngenin, Assam Rifles te hian chhuanlam tur an nei tawh lo a; an DG (Assam Rifles) pawhin Fur tui a hul hunah insawnchhuah an tum tih a hnenah a lo sawi daih tawh niin a sawi bawk.

Governor chuan Mizoram in MP zuan zang tak a nei chu lawmawm a tih thu sawiin, MP pakhat in State hmasawnna atan thil tam tak a ti thei tih a sawi a, Mizoram MP te chu tun aia nasa zawka tan la zual sauh tur leh MP Fund te pawh a zavaia hmasawnna hnathawna atana hmang turin a ngen a. 8th Schedules to the Constitution-ah Mizo Tawng telh chu thil awm tak nia a hriat thu pawh Governor chuan sawiin, a theih anga hmalak a tum thu a sawi a, Mizoram MP te pawh an theih anga tan la tur leh hemi kawnga awrawl chhuah ring turin a chah bawk. Heng bakah hian KMMTTP tangkai tur zia leh he project hnathawh peihfel thuai a nih theih dan tur te pawh an sawidun bawk a ni.