Latest News

Khawchhak tlangdung Eng pekna tur hawn a ni ta

P&E Department changtu Minister R. Lalzirliana chuan Serchhip Bukpui leh Khawzawl thlunzawmtu 132kV Line leh East Lungdar-a 132 kV Sub-Station te chu nimin khan East Lungdar-ah a hawng.

132kV Sub-Station, E. Lungdar-a he hun hmanna ah hian P&E Minister chuan 132 kV Sub-Station leh 132 kV hruipui thlun thar te hawn theih a ni ta chu lawmawm a tih thu sawiin, hnathawktute thawhrimna leh inpekna chu chhuanawm a tih thu a sawi a. Mizoram khawchhak tlangdung chu 132 kV Aizawl-Saitual-Khawzawl-Champhai line chauhin a chawm thin tih sawiin, khawi laiah emaw Lne fault a awmin nasa takin Eng a khaihlak thin a. Hetia Serchhip (Bukpui) - E.Lungdar - Khawzawl 132 kV line hman theih a lo nih takah chuan Power Supply hi Aizawl -Bukpui - E. Lungdar - Khawzawl atangin 132 kV Level a pek theih a ni dawn tih a sawi a ni.

Heng bakah hian Saitual Sub-Station atanga Eng pek Darlawn tlangdungte, Khawzawl Sub-Station atanga eng pek Ngopa tlangdung te, Serchhip Sub-Station atanga Eng pek Hnahthial tlangdung te leh Buarpui tlangdung te pawhin Eng regular zawk an hmu thei dawn tih P&E Minister chuan a sawi a, East Lungdar-a 132 kV Sub-Station hman a nih chuan he Sub-Station chawm, 33kV Zaizawhtlang Sub-Station leh 33kV Khawlailung Sub-Station ten Power Supply regular zawk leh Voltage tha zawkin an hmu thei dawn bawk tih a sawi a. Melriat leh Lunglei inkar te leh Barabi lama P&E Department hnathawh te pawh Commission thuai tum a nih thu a sawi bawk.

132 kV Sub-Station thar leh 132 kV Line thar hawnna hun hi P&E Department Commissioner & Secretary, H. Lalengmawia chuan kaihruaiin he huna tarlan a nih danin Bukpui, Serchhip to Khawzawl 132 kV Line-ah hian Section pahnih - KM 45.51-a thui 132 kV Line (from Serchhip to E. Lungdar) leh KM 48.58-a thui 132 kV Line (from E. Lungdar to Khawzawl) te a awm a. E. Lungdar Sub-Station, 33/11kV Sub-Station hi kum 2016-a Commission a ni a. He Sub-Station hian 33 kV Khawlailung Sub-Station leh 33 kV Zaizawhtlang Sub-Station te a chawm a, tunah hian 1.6MVA, 33/11 kV transformer pakhat (1) a awm a ni.

Power Supply mamawhna a lo san zel avang leh Saitual - Khawzawl - Champhai hian 132 kV Source pakhat chauh a neih avangin 132 kV Serchhip to Khawzawl via E. Lungdar line hi tihchangtlun a, E. Lungdar 33/11kV Sub-Station hi 132kV Sub-Station a siam a ni a. Improvement of 132 kV line Bukpui to Khawzawl via E.Lungdar and Construction of 1x6.31MVA, 132/33 kV Sub-Station at E. Lungdar atan hian cheng nuai 795.76 sen a ni.

Comments

Popular News (Last 30 Days)