Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Governor in Central YMA hruaitute a kawm

Mizoram Larsap Dr. Hari Babu Kambhampati chuan Central YMA hruaitute chu nimin khan a chenna Raj Bhavan-a leng-ah sawmin YMA kalphung leh ram tana an rawngbawlna chungchang a sawipui.

He inkawmna ah hian Central YMA hruaitute chuan Mizoram leh hnam tana YMA in ke a pen dan leh a hnathawh hrang hrangte tarlangin, Ramngaw leh nungcha te humhalhna tur te, Luitui leh luidung nungchate humhalhna tur leh Mizorama kawngpui tha nei tura Department te nena thawhhona te, YMA Kumpuan ‘Zirna Uar’ kalpui mek te leh Mizoram-a zirna siam-thatna tura rawtna hrang hrang a neih te chu Larsap hi an hrilh a ni.

Mizoram-a Myanmar raltlante chungchangah Central YMA hruaitute chuan Central sawrkar atanga raltlante tanpuina leh chhawm-dawlna emaw, anmahni ngaihsakna a awm lo chu pawi an tih thu Governor hnenah hian sawiin, hemi kawngah hian Governor chu theihtawpa hma la turin an ngen a. Raltlante dinhmun hrechiang turin amah ngeiin an awmna hmun pawh tlawh ve turin an ngen bawk a ni.

Mizoram chu hmarchhak kilkhawra awm a ni tih Central YMA hruaitute chuan sawi bawkin, Central sawrkar in a ngaihsak tawk lova an hriat thu leh Union Minister te pawhin an tlawh tam lo hle a an hriat thu an sawi a. Tun aia nasa zawka Central sawrkarin Mizoram rawn ngaih-sakna tura hma la turin Governor hi an ngen a. India Danpui 8th Schedule-ah Mizo tawng dah a nih ve theihna tura an hmalakna a hlawhtlin theih na tura theihtawp chhuahpui turin an ngen bawk a ni.

He hunah hian Governor chuan Mizoram leh hnam tana YMA hnathawh leh khawtlang tana a rawngbawlna hrang hrangte a lo hriat ve thu leh lawmawm a tih thu a sawi a. YMA hruaitute thu thlente chu a theih anga anga lo bawhzui pui a tum tih a sawi bawk.

Comments

Chhiar Hlawhte

Book of the Year hlan