COVID-19 positive dam leh ten a hnu lamah an taksa-ah harsatna an tawk nasa

Health Minister Dr. R. Lalthangliana hovin nimin khan State-Level Expert Committee on COVID-19 Management thutkhawm neih a ni a, he hunah hian Mizoram-a COVID-19 hri leng dinhmun te thlirin, COVID-19 positive dam leh ten a hnu lamah an taksa-ah harsatna an tawk nasa tih tarlan a ni.

SAD Conference Hall-a he thutkhawm ah hian thutkhawm kaihruaitu Health Minister Dr. R. Lalthangliana chuan Mizoram-a COVID-19 dinhmun in ziaawm lam a pan hret hret nia lang chu kan zavaia tangruala kan thawhhona rah a ni tih sawiin, “Theihtawp chhuaha tha leh zung senga mi zawng zawng kan tanrualna rah kan seng mek hi tichhe lo turin mimal tin kan la fimkhur chhunzawm rih zel erawh a pawimawh a ni,” a ti a. Hripui leng vanga tawrhna nasa tak karah thil lawmawm kan tawng ve leh zel thin tih sawiin, hriselna tehfung pawimawh tak, nausen thi zat (Infant Mortality Rate) thar ber Sample Registry Survey in October, 2021-a a tichhuahah Mizoram leh Nagaland chu nausen piang 1000 zelah 3 boral anga chhut niin, he tehfung atanga chhutin India ram State zingah nausen thi tlem berna kan ni, a ti bawk.

He thutkhawm ah hian Mizoram Chief Secretary thar Dr. Renu Sharma-i pawhin Mizoram-a COVID-19 hri leng mek chu tun dinhmunah India rama State dangte aiin a la sang deuh tih sawiin, hei hi amah pawhin a ngaih pawimawh hmasak ber tur a ni tih a sawi a, tha tak leh theihtawp chhuah tlanga kan thawhho a duh thu sawiin, hmasawnna hna dang thawh kawngah pawh sawrkar hnathawkte thawhona tha tak an neih a beisei thu a sawi a. Prime Minister in Vaccination Drive a ngaih pawimawh thu sawiin, Target Group kan neihte hi kumin Krismas hma hi chuan thleng kim vek turin tan kan lak a ngai dawn thu a sawi a. sawrkar hnathawkte chu midangte entawn tur leh zirtirtu tur an ni tih inhre renga an hna te dik tak leh rinawm taka hlenchhuak thin turin a chah bawk.

Nimin-a thutkhawm ah hian mahni In lama Rapid Antigen Test Sample Test Kit hmanga lo in test zingah hri kai, a tira inzep leh an nat zual tak hnua buaipui ngai an awm thin thu tarlan a ni a, mahni a sample test lo positive an awm a nih chuan Medical mite emaw, LLTF/VLTF hnenah emaw in report zel se an duh thu an sawi a. Taksa-a hri kai lanchhuahna neite a hma thei ang bera hmuhchhuah a pawimawh thu sawilan leh niin, a bik takin hritlang leh khawsik neite chu rang taka in test vat zel turin an duh thu an sawi a, Aizawl khawpui hmun hrang hrang 19 ah sample test na ‘kiosk’ dah a nih tawh tih tarlan a ni.

COVID-19 hri kaite hmuhchhuah an nih hnua an dinhmun enchianna ah Zunthlum, BP Sang etc, nei tih hriatchhuah hnuhnawh an tam thu pawh tarlan a ni a, mipuiten anmahni hriselna inchik uluk lehzual se an duh thu tarlan a ni.

Hei bakah hian COVID-19 vanga nunna chante chu natna benvawn nei vek an nih loh avang leh thalai insawiselna neilo te pawh an awm avangin mitin kan fimkhur a ngai tih an sawi a, hri kai inhriat-chhuah hma a, inenkawl hma a nih chuan damchhuahna chance a sang tih a nih vangin mitinin mahni inchik reng a, ngaihthatlohna nei chu rang taka in test ngei ngei turin mitinte an chah a ni.

COVID-19 hri kai dam leh ten a hnu lamah an taksa-ah harsatna an tawk nasa tih tarlan a ni a, symptom nei na vak lo te zingah leh a tuar nep nia inhriate pawhin hetiang harsatna chi hrang hrang hi an nei a, taksa peng pawimawh te bakah an hriselna hrim hrim pawhin a tawrh chhunzawmte an awm avangin hri kai dam-chhuak te chu mahni inchik reng se, a tul anga Doctor te rawn thuai thuai thin se a that thu an sawi a. Hri kai hmuhchhuah zat 5% aia hniam a nih hma chuan hripui leng hi thunun a la nih loh avangin mipuite chu la inthlahdah rihlo se an duh thu an sawilang bawk a ni.

Comments

Popular News (Last 30 Days)

Serchhip DCSO sawn a ni