Serchhip District-a NGO ten Serchhip DMS kawmin Hospital hmasawnna tur hrang hrang an sawipui

Serchhip District NGO Coordination Committee hruaitute chuan nimin, Nov. 15, 2021 chawhnu khan Serchhip District Medical Superintendent (DMS) mawhphurhna la mektu Dr. Lalnunhlima Khiangte chu a Pisa-ah hmuin Serchhip District Hospital inrelbawlna chungchangah an ngaih pawimawh hrang hrang an sawipui.

Serchhip DMS Pisa-a an inkawmna ah hian NGO Coordination Committee Chairman Kawlthuama chuan tunhnaiah Serchhip District-a tlawmngai pawl- YMA, MHIP, MUP, MZP leh MSU telna NGO Coordination Committee chuan thutkhawm an neih thu leh Serchhip District Hospital chungchang sawihona neiin an thurel bawhzui hian tunhnaia Serchhip District Hospital-a nausen thihna chungchang leh Hmeichhe lam thiam Doctor chungchangah ngaihdan leh duhdan an neih te thlen an rel angin tun tumah hian ziakin an thlen tih a sawi a. Serchhip District Hospital a mualpho a nih chuan Serchhip District tan pawh mualphona a nih avangin District Hospital in tha taka mipuite tana hna a thawh chu an duh thu a sawi a ni.

He hunah hian Serchhip District NGO Coordination Committee hruaitute chuan Serchhip District Hospital chungchanga mipuite atanga sawiselna leh rawtna an dawn hrang hrangte sawiin, heng zingah hian damlo leh a awmpuitute tana Hospital Duty te koh an har thin nia sawi chungchang leh Duty ten damlo awmpuitute damdawi pek leh thildang an tih tir thin nia sawi chungchang te, Doctor On-Call te koh an nih hnuah an kal har thin nia an hriat thu te, Nurse Senior zawk ten Junior zawk te en lo fuih thin dan chungchang te, Hospital-a thawk ten aikal an lak chungchang leh aikal ten duty rei tak an neih thin avanga damlo an enkawlna kawngah harsatna a awm phah thin nia an hriat thu te, damdawi In-a thawktute inenkawlna khauh zawka kalpui a tul nia an hriat thu leh Hmeichhe lam thiam Doctor in hun rei tak chawlh a lak avanga harsatna thleng leh hemi kaihhnawih a harsatna awm te an sawilang a. MHIP Sub-Hqrs. Serchhip hruaitute chuan Gynea chungchanga harsatna thlengah thawktute nen inkawmna an lo neih tawh thu pawh sawiin, damdawi In-a thawktute chu an in fuihphur tawn ve reng a pawimawh nia an hriat thu te pawh an sawi bawk.

He hunah hian Serchhip District Medical Superintendent mawhphurhna la mektu Dr. Lalnunhlima Khiangte chuan NGO Coordination Committee hruaitute thu thlen hrang hrangte chu tha taka lo dawngsawngin, a theih anga bawh-zuiin hma an lo lak tur thu a sawi a. Tunah hian damlohna avanga chawl mek Serchhip DMS pawhin a hna a rawn zawm thuai beisei a nih thu sawiin, ani hnenah pawh an lo thlen tur thu a sawi a, Serchhip District Hospital in hma a sawn zel theihna tura pawimawh nia an hriat hrang hrangte pawh he hunah hian an sawiho bawk.

Comments

Popular News (Last 30 Days)

Serchhip DCSO sawn a ni