Chanchin thar thenkhat :

BaLA Anganwadi hawng

Central Warehousing Corporation, Guwa-hati atanga Corporate Social Responsibility (CSR) kaltlanga ruahman Lunglei khawpui chhunga ‘BaLA Anganwadi Centre’ pahnih, Pukpui I & II Centre te chu nimin khan Lunglei District Bawrhsap Kulothungan A chuan a hawng a, naupan tet laia inzirtirna leh inkaihhruaina (early childhood education) a pawimawh thu sawiin, ‘BaLA Anganwadi Centre’ te chu khawtlang tana kawng hrang hranga hmasawnna thlentu anih ngei a beisei thu a sawi bawk. BALA (Building as Learning Aid) Anganwadi Centre’ hmalakna hnuaiah hian Anganwadi Centre thlanchhuah ah te naupangte zirna kawnga puitu (learning aid) hrang hrang ruahman sak niin a building-ah hian lemziak thiam ten naupang hriat tur leh an rilru kaihruai tur pawimawh hrang hrang an ziah chhuah bakah naupang infiamna leh furniture thar te ruahman niin Centre tinah thlai chinna hmun te siam a ni.

Ruantlang-ah In pakhat chim

Tunhnaia ruah sur nasa avanga leimin vangin nimin zing dar 7:30 vel khan Champhai Ruan-tlang Mual Veng VC huamchhunga Chuangkimi te chenna In (Semi-RCC) chu a chim a, mihring thi leh hliam awm lovin nimin khan khawtlang in In chhia senghawi hnatlang hi an thawk nghal a ni. He chhiat tawhna hmun hi nimin khan Cham-phai DC Maria CT. Zuali chuan tlawhin sawrkar atanga tanpuina awm thei ang ang pek an nih tur thu a sawi a, Champhai South bialtu MLA TJ. Lalnuntluanga chuan hnatlang te thingpui in na atan Rs. 5000/- a pe nghal bawk.

CADC Dy. Chairman thlang

Chakma Autonomous District Council-a MDC Lakhi Dhan Chakma chu nimin khan chuhtu awm lovin Deputy Chairman-ah thlantlin a ni. CADC-a Deputy Chairman ni \hin Anil Kanti Chakma chuan Oct. 10, 2021 khan banna a thehluh avangin Deputy Chairman thlanna hi neih niin Longpuighat bial a\anga thlantlin Lakhi Dhan Chakma chiah hian Nomination aa file a ni.

ZPM in CBI kohluh an phut

ZPM Thalaite chuan nimin khan thuchhuah siamin Sakawrhmuituai tlâng Skywalk siamna turah hnathawhna hnuhma awm mang si lova cheng nuai 287.25 lai sên a ni leh hnathawhna hnuhma awm mang lo bawk, Chaltlâng-Durtlâng Ropeway siamna tura cheng nuai 1317.80 lai mai hman ral a nih danah thil fel lo tak a awm ngei nia an hriat thu an sawi a. He thila mawhphurtu awm zawng zawng, Contractor leh sawrkar Level-a mawh-phurtute laka na taka action lak a nih theih nan a chhuitu tur CBI ko lut ngei turin MNF sawrkâr an phut thu an sawi bawk.

Aviation Minister ah thlen

BJP Mizoram Pradesh State Vice President JB. Rualchhinga leh hruaitu thenkhat te chuan niminpiah khan Union Civil Aviation Minister Gen. VK. Singh chu hmuin Mizoram a Helicopter service pakhat chauh kan neih in mipui mamawh a phuhru zo lo deuh nia a lan avang leh rikrum thila awlsam zawka inkalpawh a nih theih nan Helicopter dang Service tur pek belh turin an ngen a, Mizoram khaw lian leh kilkhawr deuh a Helipad siamna siam sak turin an ngen a, Minister hian an thil thlen te chu a tihsak nghal tur thu a lo hrilh a ni.


PAC in sawrkar hmalakna a hmunah an enfiah

Mizoram Legislative Assembly hnuaia Financial Committee peng pakhat, Public Accounts Committee chuan niminpiah khan C&AG Report of India 2015-2016 behchhanin Agriculture Department hnuaia Bamboo Plantation-a Sawrkar hmalakna hrang hrang endikin Seling, Thingsul Tlangnuam leh Sesawng khuate an tlawh a. Nimin khan C&AG Report of India 2014-2015 a Environment, Forests and Climate Change Department hmalakna hrang hrang bakah Slaughter House, Mualpui leh Zoram Medical College (Falkawn) a Incinerator te an endik a, hemi hnu hian C&AG Report of India 2015-2016-a tarlan Agriculture Department hnuaia hmalakna thenkhat Aloe Vera, Passion Fruit Plantation Saikhamakawn, Melriat, Melthum a mite endikin an kal leh bawk.

Tuirial bialtu MLA in Tuirial bial tlawh mek

Tuirial bialtu MLA atana thlan thar K. Laldawngliana chuan nimin khan a bial chhunga Kawnpui leh Hortoki khua te tlawhin Kawnpui Playground No. 2-a Astro Turf phah a nih theih nan Mizoram State Sports Council Engineers-te leh Surveyor-te nen a hmunah an enho a, Hortoki khua a chhun leh zan-a Volleyball khelh theihna tur siamna hmun tur an en ho nghal bawk. Tuirial bialtu MLA hian Kawnpui PHC pawh tlawhin MLA hmasa Andrew-a'n bul a lo tan, chawlhsan a awm ta, MO Office leh Laboratory Room-te chu MLA Fund hmanga sak puitlin a nih tur thu sawiin, Kawnpui PHC chu CHC-a hlangkai turin chak taka hmalak mek a nih thu leh File pawh a kal mek thu a sawi bawk.