Bye-election hlawhtling thawkhat niin DEO in hria

Kolasib District Election Officer Dr. H. Lalthlangliana chuan Tuirial Assembly Constituency bye-election-ah inthlanna muanawm leh felfai nei tura tan an lak avangin a hlawhtling thawkhat viau nia an hriat thu a sawi.

Nimin-a a Pisa-a thuthar thehdarhtute a kawmnaah Dr. H. Lalthlangliana chuan a tlangpui thuin khawi laiah te chu sawi awm mah se, Tuirial bial bye-election chu a hlawhtling thawkhat nia an hriat a sawi a. “Kan Observer te pawhin inthlanna felfai leh muanawm a hmuh avangin mak an ti hial a, hetiang hi khawi Society-ah mah an la hmuh ngai loh thu sawiin, lawmthu min hrilh hial a ni,” a ti.

Tun tum inthlanah thil danglam, tun hmaa buaipui luih luih Bru Refugee te tana Special Booth emaw, Ballot Paper emaw ngaihtuah miah loha Polling Station pangngaia vote thlak tura ruahman vawi khatna niin, Mizoram pum tan pawh thil thar a nih thu DEO chuan a sawi a. “Inthlan dawn tlai thleng pawhin ruahmanna an siam em tiin kan thlir reng a. Election Commission pawhin Mizoram mipuite duhdan zahin, buaipui lovin inthlan vote pangngaiin kan thlak ta a ni,” a ti a. “Anmahni Roll-a awm pathumin vote an thlak thei hram a. Amaherawh chu, Hortoki-a awm nghet tawh, an Roll-a la awm si refugee anga Roll-a chhiar tel ni mah se, Mizorama cheng nghet tawh a ni,” a ti bawk.

Political Party te tun tum bye-election tluka inbeihna nasa a awm loh avangin campaign theih loh hun chhung 'Silent period' pawh ni dang aia khauh taka an kenkawh thu sawiin Dr. H. Lalthlangliana chua, “A hahthlak viau, ni danga hriat ngai hleih loh kan Political Party Leader lian te dan beh leh in man thuak thuak te awm mah se, min hrethiam takin thuneitute ngenna an zah thin,” tiin invauna emaw, hmaisen inhmuhna awm lovin thuawi taka an awm avangin lawmawm a tih thu a sawi bawk.

Inthlanna dan bawhchhiaa Politcial Party pathumte laka MPF in complaint an thehluh chungchang zawhna chhangin Dr. H. Lalthlangliana chuan, “Kan chhui zui a, Show Cause Notice kan pe a, an rawn chhang a, a then chu an inpawm a, inpawm lo pawh an awm,” tiin heng te hi inthlan senso-ah cut sak an ni tih a sawi a. Model Code of Conduct bawhchhiatna tih ni mah se, MPF leh All Party te thawhhona thuthlung bawhchhiatna zawk a nih thu a sawi. MNF Adviser leh Minister ni bawk Robert Romawia Royte in dan a bawhchhiat leh bawhchhiat loh chungchang zawhna chu, “Bawhchhia a tih theih a, bawhchhe lo pawh a tih theih. Dan in a tum taka chu campaign loh tih a ni,” tiin, Tlawng ral lamah MPF ten midanga an biak hmain an thlah liam thu leh vote thlak chhung zawng chu Tlawng ralah a awm thu a sawi a. “Tlawng ral chin hi Tuirial Constituency pawn a ni,” a ti bawk.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man