Bawlhhlawh tawih thei atanga leitha siam tumin Serchhip-ah hmalak mek a ni

Serchhip khawpui chhunga UD&PA Department in bawlhhlawh an lakkhawm ah Tawih thei leh Tawih theihlo an thliarhran ah Tawih thei chu Leitha siamna atan hman tum a nih avangin kalpui chhunzawm zel tum a nih thu District Urban Development Officer (DUDO) Dr. Albert Vanlalliantluanga chuan a sawi.

UD&PA Department in Serchhip khawpui-a bawlhhlawh an lakkhawm an kalpui chhunzawm dan tur chungchangah nimin khan Serchhip DUDO chuan tuna an hmalakna chu kalpui chhunzawm zel tum a nih thu leh Mizoram khawpui te zingah bawlhhlawh tawih thei atanga leitha siamchhuak thei hmasa ni turin hma an lak mek thu LENKAWL a hrilh a, Serchhip bawlhhlawh paihna, Dumping Ground-ah tawih thei paihna tur hmun an siam tawh thu leh helai hmun atang hian bawlhhlawh tawih hmanga leitha siam tum a ni tih a sawi a, hemi atan hian Changpat pawh la turin inbiakna neih fel a nih tawh thu leh, mipuite bawlhhlawh tawih thei paih chu ni 1-20 chhunga tawih tura ngaih a nih thu leh hemi atang hian Changpat hmanga leitha (Vermi Compost) hi siam a nih dawn thu a sawi a ni.

Serchhip DUDO chuan hetianga bawlhhlawh tawih thei atanga leitha siam tura hma an lak mek avang hian mipuite bawlhhlawh paih tur an lakkhawm thin ah pawh mipui ten bawlhhlawh tawih thei leh tawih theilo thliar hrang uluk se an duh tih a sawi a. Tun thla ni 1 atanga bawlhhlawh thliarhran an kalpui ah hian mipuite awlsam zawkna atan bawlhhlawh paih hun pangngai ah paih chhunzawm tura ruahmanna siamin tawih thei leh tawih theilo te chu thliar hrangin, a bawm tawn phuina atana hman tur bik ruahman chu hmang hram hram turin a chah a. Heng bawlhhlawh te hi a tawnna rawng a zirin Dumping Ground-ah hian a hranga paih zel a nih dawn thu a sawi bawk.

Serchhip mipui ten bawlhhlawh an paih zinga a tam ber chu tawih theilo a ni tih DUDO chuan sawiin, mihring tana hlauhawm phei chu paih tur a awm mang lo nia a lan thu a sawi a, bawlhhlawh atanga leitha siam tura hma an lak avang hian lehkha te pawh tawih theilo-ah zel paih a nih tur thu a sawi bawk.