Latest News

Vairengte-ah Mizoram Police Company khat dah tum niin cheng nuai 223 ruahman fel a ni tawh

Home Minister Lalchamliana chuan ramri venhim chu sawrkar thil ngaih pawimawh ber pakhat a nih avangin Vairengte-ah Mizoram Police Company khat dah tum a ni tih sawiin, hemi senso atan hian cheng nuai 223 pawh ruahman fel a nih tawh thu a sawi.

Mizoram Police Service Association (MPSA) General Conference vawi 12-na nimin-a 3rd Bn. MAP Ground, Mualpui-a neih a hmanpuina ah he thu hi sawiin Home Minister chuan COVID-19 hrileng avanga Mizoram in hun harsa a paltlang mek lai hian Mizoram Police te tangkai zia leh thawhhrimna mipuiin kan hre chiang thar leh tih a sawi a. “Ramri avanga buaina a chhuah takah phei chuan State dang Police te khaikhina tlem zawk fe ni mahse, Mizoram Police inpekna leh huaisen zia te kan hmu chiang em em a. Mizoram mipui ten kan thlamuan pui a, Mizoram leh Mizo mipuite zahzawmna humhim tura an inpekna ropui tak avangin kan chhuanga, an chungah lawm kan sawi a ni,” a ti.

Home Minister chuan Police mamawhna a san rualin COVID-19 hrileng avanga India ram pum huap anga sum leh pai-ah harsatna tawh a nih avangin Police hnaruak hnawhkhah ngai, la hnawhkhah theih loh sang tel teh meuh a awm tih pawh sawiin, State chhung ralmuanna atan te, dan leh thupek kenkawh kawngah harsatna liantham a awm loh nan sawrkar chuan Police hnaruak hnawhkhah chu a ngai pawimawh em em tih a sawi a, COVID-19 hrileng a ziaawm hunah leh sum leh pai-a kan state dinhmun a ziaawm hret hunah heng Police hnaruak te hi hnawhkhat turin Home Department chu a in peih sa reng tawh tih pawh sawiin, ramri venhim chu sawrkar thil ngaih pawimawh ber pakhat a nih avangin Vairengte-ah Mizoram Police Company khat dah tum a nih thu leh hemi senso atan hian cheng nuai 223 pawh ruahman fel a nih tawh thu a sawi bawk.

Nimin-a MPSA General Conference hi Chief Secretary Lalnunmawia Chuaungo pawhin hmanpuiin John Neihlaia, IGQ( HQ) & Acting DGP pawhin he hunah hian thu a sawi a. An Member boral te sunna leh member thar te lawmluhna hun pawh hman a ni bawk.

Comments

Chhiar Hlawhte