Serchhip District-ah hri kai an la pun belh zel

Nimin tlai thleng khan Serchhip District-a COVID-19 hri kai hmuhchhuah chu 3102 zet an tling tawh.

Nimin lama kan rawn tarlan tawh bakah niminpiah khan Serchhip District-ah Rapid Antigen Test hmangin hri kai mi pahnih hmuh belh niin TrueNat Laboratory-a Sample enfiah atangin hri kai mi 10 hmuh belh an ni bawk a. 

Hriat theih chinah nimin khan hri kai mi 90 zet chhinchhiah belh awm lehin amaherawh chu heng mite hi nimin-a hmuhchhuah vek an ni lo thung a, niminpiah lama Khawbel khua-a hri kai hmuh thar mi 71 te chu nimin-a hri kai ziahluh zingah hian telin heng bakah hian Vengchung-ah 5, Chhim Veng-ah 3, New Serchhip-ah 2 leh Dinthar Veng leh IOC Veng-ah hri kai mi pakhat ve ve hmuh belh an ni bawk a. Serchhip Town Area pawn lamah Keitum khua-ah hri kai mi 6 hmuh niin Thenzawl-ah 4 leh Chhingchhip-ah hri kai mi pakhat hmuh belh an ni.

Hetihlai hian nimin khan Serchhip District-a hri kai mi 41 te chu enkawl dam an nih hnuah anmahni enkawlna hmun atanga chhuahtir an ni a, heti hian nimin tlai dar 5:00 thlenga Serchhip District-a hri kai hmuhchhuah chu 3102 ni tawhin an zinga 2455 te chu enkawl dam an ni tawh a, hri kai hmuhchhuah atanga za zela 79.14 te chu enkawl dam ni tawhin hri kai enkawllai 640 zet an awm tawh a, hri kai zingah mi 7 an boral tawh bawk a ni.