Latest News

Rampawn atanga Vawk lakluh chungchangah Sawrkar thu lo ngaichang turin Vawkvulhtute chah

Mizoram-a Vawk hri leng, African Swine Fever (ASF) hmuhna hmasa ber, Lungsen khua chu nimin khan AH&Vety Minister Dr. K. Beichhua chuan tlawhin, Vawk vulh bul tan that lehna atana Vawk lakluh chungchang ah sawrkar thu lo ngaichang turin vawkvulhtute chu a chah.

African Swine Fever (ASF) hri leng hi kumin March thla khan Lungsen khua ah hian hmuhchhuah tan niin nimin khan AH&Vety Minister chuan Lungsen khua hi tlawhin Vawk hrileng avanga khawtlangin harsatna hrang hrang an tawh chungchangah khawtlang hruaitu NGO leh VC te nen Lungsen YMA Hall-ah inkawmna an nei a. He hunah hian AH&Vety Minister chuan Zoram mipui tana sawrkarin hmachhawp a neih te chak taka bawhzuia, kal an tum mek laiin beisei loh lam atangin harsatna hrang hrang a rawn thleng tih sawiin, “Heng karah hian hmalam panin ke kan pen zel dawn a ni,” a ti a. Vawk pul hrileng chungchangah Lungsen mipuite dinhmun a hriatthiampui thu leh zangnadawmna pe thei turin sawrkar laipui-ah theihtawp chhuahin an bei mek zel tih a sawi bawk. 

Dr. K. Beichhua chuan Vawk vulh bul tan that leh chungchangah rampawn atanga lakluh duh an awm leh tawh tih sawiin, “Sawrkar hian kan ram mipui tana tha ber tur a ngaihtuah thin a, kan mithiam ten ‘a him tawh e’ an tih hunah chuan a tul angin mipui tan Department pawhin Vawk no tha chu a lalut thei a ni,” a ti a, Vawkvulhtute chu sawrkar thu lo ngaichang turin a ngen nghal bawk. AH&Vety Department chhinchhiah danin Lungsen khua leh a chhehvel ah hian African Swine Fever hrileng avanga Vawk thi zat chu 960 a ni.

He hunah hian SEDP AH&Vety Board Vice Chairman C. Lalmuanpuia MLA pawhin ASF hrileng hi Vawk vulhten inzirna atan hmang tur leh beidawng lova chakna petu atana hmang se tih a duh thu a sawi a, sawrkar thupek zawm tha zelin engtik ni-ah emaw chuan Sa ah Mizoram a intodelh ngei a beisei thu a sawi bawk.

Social Welfare Department changtu Minister ni bawk Dr. K. Beichhua leh amah zuitute hian Social Welfare Department kaltlanga Lungsen-a Eklavya Model Residential School (EMRS) sakna tur hmun an enfiah bawk a. He School din tur chungchangah Minister chuan Land Lease chu Central lamin VC pass te a lo remtih loh avangin Land Revenue Department ah lehkha a kal mek a, tihfel a nih hunah hna pawh tan theih thuai a beisei thu a sawi bawk.

Comments

Chhiar Hlawhte