Tripura-a awm Tuikuk, Mizoram-a Vote nei te chungchangah Objection ala awm lo

Kolasib District Election Officer leh District Bawrhsap Dr. H. Lalthlangliana chuan Tripura a awm Tuikuk ten Mizoram-a Vote an la neih chungchangah Vawiin thlenga Objection ala awm loh avangin Electoral Roll atanga paih an la ni lo tih a sawi.

Tuirial Assembly Bial bye-election neih tur chungchangah nimin khan Kolasib DC Conference Hall-ah NGO, Political Party aiawh leh MPF hruaitute chu Kolasib District Election Officer kaihhruaina in hriattur pawimawh inhrilhhriatna neih a ni a, he hunah hian Kolasib Sub-Hqrs. YMA aiawhte chuan Tripura a awm Tuikuk zingah Tuirial bial-a Vote nei mi 660 an la awm thu sawichhuakin, heng mite Vawiin thlenga Electoral Roll-a an la awm chungchangah Kolasib District Election Officer Dr. H. Lalthlangliana chuan Form 7 hmangin Vawiin thlengin Objection a la luh loh thu a sawi a, Roll Revision neih dawn ah NGO te leh Political Party aiawh te siamthat an duh te Form hmanga thehlut tura an tih laiin Tuikuk chungchang Form hmangin complain a la luh loh thu a sawi a. Electoral Roll-a an la awm vangin vote thlak chu an dikna chanvo anih sawiin, hetihlai hian Polling Station pangngai ah Vote an thlak chuan harsatna an neih a rin loh thu a sawi a, a hrana Polling Station siam sak an nih chuan harsatna awm theih a rin thu a sawi a. Election thuneitu te bulah pawh rawtna thlen a tum thu a sawi bawk.

He thutkhawm ah hian Dr. H. Lalthlangliana chuan inthlanna fel fai leh thianghlim neih a pawimawh thu sawiin, Covid laka him leh Model Code of Conduct kenkawh that a pawimawh thu a sawi a, MPF te chu Model Code of Conduct chungchang ah hma la tura ngenin, hun danga inthlan nen inan lohna lai awmin, COVID-19 darh tur ven kawng ah hmalak a ngai a, party hruaitute pawhin mipui pungkhawm lo zawnga campain neih nise an ti a. SOP-ah House to House Campaign mi 5 chin phalsak mahse House to House campaign chu a theih hram chuan neih loh nise an ti bawk.

Election-a Duty turte pawh tihfel thaw-khat a ni tawh tih DEO chuan sawiin, COVID-19 Vaccine full Dose la ngei duty tir an tum thu leh Full Dose la la lo te pawh lak tir vek tum a nih thu a sawi a, Political Party te pawh Campaign turah vaccine Full Dose la tawh leh hri laka him ngei te chauh tir thei se a duh thu a sawi bawk a. Kolasib District-ah COVID-19 hmuh a tlem chhoh zel thu leh Mizoram-a District hrang hrang zingah enkawl lai nei tlem ber zingah an tel chhoh mek thu a sawi a, mipuite chu Candidate te emaw, Party hruaitute emaw chibai kher tum lo turin a chah bawk.