Chanchin thar thenkhat :

India Hnam Pa zahna hlan

Inrinni kalta, October 2, 2021 kha India Hnam Pa, Mahatma Gandhi piancham 152-na a ni a, he ni-ah hian ramchhung hmun hrang hrangah amah zahna leh chawimawina lantirna hun hman niin Aizawl-ah chuan zing kar-ah Aizawl Zodin Square-a a Lim-ah Chief Minister, Zoramthanga leh sawrkar mi pawimawh ten zahna chibai bukin Pangpar an dah a ni. Mahatma Gandhi pian-cham hi India Sawrkar-in ram pum chawlh (National Holiday) atana a puan zinga mi a ni a. Kum 2007 khan United Nations General Assembly chuan October ni 2 hi ‘International Day of Non-Violence’ ah a puang nghe nghe a ni.

Larsap in puantahtute kawm

India Hnam Pa, Mahatma Gandhi piancham vawi 152-na pualin Mizoram Governor Brig. B.D. Mishra chuan Inrinni khan Raj Bhavan-ah kuttah puantahtu te a kawm. He inkawmna ah hian Governor chuan India Hnampa piancham ah hian a zirtirna, ‘Ramdang mite rahbeha awm loh nan intodelh a pawimawh hmasa ber’ tih a zirtir thin chu chhawm chhoh zel nise tiin, “Pu Gandhi-a chuan Intodelhna tur kawng hrang hrang te duangin Puantah hmangin bul a tan a, Kum tam a liam hnuah Prime Minister Narendra Modi chuan Pu Gandhi-a ngaihdan rawn tawmpuiin India ram intodelhna tura nasa taka tan lak - Aatma Nirbhar Bharat chu a kalpui ta a ni,” a ti. He hunah hian Governor leh Lady Governor Neelam Misra te chuan puantahtute chu an eizawnna chhun-zawm zel tura chahin, Puantahtute hnenah hian Lady Governor chuan la duang engemaw zat a pe bawk a ni.

BJP Candidate tur tifel

Tun thla ni 30-a Tuirial bial-a Assembly bye-election neih tur atan BJP Mizoram Pradesh chuan an State Spokesperson K. Laldinthara chu an din tir dawn nia thudawn niin New Delhi lamah an tifel tawh tih thudawnna chuan a sawi a, Vawiin chhun hian an Candidate tur puanchhuahna hun hi Aizawl-ah an nei dawn a ni.