Serchhip bialtu MLA in Serchhip leh Thenzawl-ah Sample Test-na khawl a pe

Serchhip bialtu MLA Lalduhoma chuan Inrinni kalta khan a bial chhunga damdawi In awmna, Serchhip leh Thenzawl-ah te COVID-19 hri leng dona atana hman turin Fluorescent Immunoassay (FIA) khawl leh Test Kit 250 ve ve a hlan.

Lalduhoma hian Inrinni khan lehlang-a a Bial rawn fangin chawhma dar 11:00-ah Serchhip CMO kutah FIA (Fluorescent Immunoassay), Standard F200 FIA Analyser leh Test Kit te hi a hlan a, hemi puala inkhawm tawi Serchhip CMO Office Tual-a neih ah bialtu MLA chuan Sample test-na rintlak neih chu COVID-19 hripui leng mek dona kawnga pawimawh tak a nih thu sawiin, chumi atana rintlak kan hman ber chu RT-PCR khawl a nih thu leh amah ngei pawhin nikum lama hri len tirh lamah pawh RT-PCR khawl hi sawrkar pek a lo tum tawh thu leh sawrkar lam erawhin tul an ti lo tih a sawi a. Hei vang hian Mizoram-ah Rapid Antigen Test chu kan hman ber la niin hetah hian hri kai si, hri kai lo anga hmuh theih tam tak awmin, chung te nen chuan kan khawsak ho zel bawk si avangin hri leng in ziaawm lam ala pan theilo tih a sawi a. Mizoram-a hri leng chungchangah hian Central lam pawhin mithiam a rawn tir dawn tih a sawi.

Serchhip bialtu MLA chuan tun tuma Sample enfiahna khawl a pek chu Precision Instruments Company atanga lei niin, he company hian wholesale rate-a an pek bakah, pakhat dang a thlawna an pek tel bawk thu a sawi a. A hman danah pawh Lab. Technician-te'n harsatna an neih pawhin Company lam hian a thlawnin training an pe thei dawn tih a sawi a, Laboratory hran siam ngai lova hman theih a ni tih sawiin, tunah hian Mizoram-ah pathum a awm tawh thu leh Aizawl pawn lamah chuan tun tum ami hi a hmasa ber tur a nih thu a sawi a. Khawl kan ngah chuan chak zawk leh tam zawk Sample enfiah theih a nih dawn thu sawiin, hri leng dona kawngah mipui leh thawktute tan zangkhaina a nih dawn thu a sawi a. Serchhip Bial mipuite leh thawktute chuan mamawh an neih te a hnena thlen zel tura chahin, an tih theih chin chu a lo tih zel tur thu a sawi bawk a ni.

Serchhip CMO Dr. Laldawngliana kaihhruai he hunah hian Serchhip District Surveillance Officer Dr. Lalngaihawmi Chhangte chuan Bialtu MLA in khawl tha tak a pe chu lawmawm a tih thu sawiin, he khawl hman dan leh hnathawh dan te a sawifiah a. Thenzawl-ah hri kai hmuh an tam thin thu leh TrueNat Laboratory leh ZMC lama Sample thawn ngai pawh an ngah thin thu sawiin, hemi kawnga harsatna an tawh thin te chu he khawl hian a sutkian sak dawn tih a sawi bawk. Serchhip-a he khawl inhlanna neih zawh a nih hnu hian bialtu MLA hian Thenzawl pan nghalin CHC-ah hetiang khawl leh Test Kit 250 bawk a hlan a, Buangpui khua pawh a tlawh nghal bawk.