Inkhuahkhirhna siam thar

Mizoram sawrkar in COVID-19 hri leng mek ah inkhuahkhirhna a siam thar angin Serchhip District-ah pawh inkaihhruaina thar siam a ni a, Pathianni/Sabbath ni chhun-ah inkhawm theih a ni tawh dawn.

Hemi chungchanga Inrinni kalta a Serchhip District Bawrhsap in tun thla ni 16 thlenga hman tur inkaihhruaina thar a tih-chhuah ah hian Inkhawm chungchangah CAB khauh taka zawm chungin Pathianni/Sabbath ni chhunah Biak In-a leng zat chanve (50% seating capacity) aia tam lovin Kohhran Inkhawm pangngai neih phal a ni a, zing leh tlai tawngtai inkhawm pawh phal a ni bawk tih tarlan a ni.

Hei bakah hian Inneih Inkhawm leh Mitthi vuina ah pawh Inkhawm neihna hmuna leng zat chanve (50% seating capacity) emaw, mi 50 emaw aia tam lo (a tlem zawk zawk) tel phal a ni a, ei leh in erawh sem phal a ni lo thung a. Picnic Spot te pawh CAB uluk taka zawm chungin hawn phal niin tum khatah mi 50 aia tam punkhawm phal a ni lova, Public Park te pawh CAB uluk taka zawm chungin Public Park awmna VLTF-te phalna a hawn phal a ni.

Sports practice chungchang ah Indoor-ah mi 20 aia tam lo leh Outdoor-ah mi 50 aia tam lo tan phal a ni a, Sports Tournament pawh entu awm lova phal niin Event neihna hmun zat chanve (50% capacity) emaw, mi 50 emaw aia tam lo (a tlem zawk zawk) tum khata punkhawm phal a ni bawk a, mipui punkhawmna dang (Birthday lawm, anniversary lawm leh a dangte) chu punkhawmna hmun zat chanve (50% capacity) emaw, mi 50 emaw aia tam lo (a tlem zawk zawk) tum khata punkhawm phal a ni a, a huho a pawnchhuah te pawh CAB uluk taka zawm chungin mi 20 aia tam lo tan phal a ni.

Heng bakah hian Hawkers Stall te pawh zing dar 5:00 atanga tlai dar 6:00 thleng hawn phal niin mikhual thlenna In te hawn phal a ni ta bawk a, Restaurant te pawh mihring pungkhawm thei chin siamin hawn phal a ni tawh bawk a ni.