Latest News

Faina Hapta hawnna leh Fai lawmman semna neih a ni

Town chhunga VC Area fai ber - Chanmari VC

India ram zalenna kum 75 tlin lawmna, Azadi Ka Amrit Mahotsav (AKAM) puala Faina kawnga hmalakna kharna hun leh Faina Hapta-2021 hawnna chu Inrinni khan Serchhip-ah neih niin Faina kawnga hma la tha te hnenah lawmman sem a ni a, Serchhip Town chhunga VC Area fai berah Chanmari VC chu thlan a ni.

Azadi Ka Amrit Mahotsav (AKAM) kharna leh Faina Hapta-2021 hawnna hun Serchhip DC Conference Hall-a neih hi Serchhip District Bawrhsap Kumar Abhishek IAS chuan khuallian nia hmanpuiin AKAM hmalakna chi hrang hrang, bawlhhlawh thliarhran inzirtirna te, Faina-a inelna te, bawlhhlawh paih tur hman tangkai inzirtirna atana Waste to Art Exhibition te leh a dangte a hlawhtling hle-a a hriat thu sawiin, amalakna te a hlawhtlin theih nana thawktute zawng zawng chungah lawmthu a sawi a. Kan chenna khawvel hi naktuk-a kan fate tan pawha chenna tlak, hmun thianghlim leh hrisel ni zel tura kan enkawl a tul a, chu thilah chuan mitinin mawh kan phur a ni, a ti. Bawrhsap chuan kan bawlhhlawh tawih theilo te hi khuarei ngaihtuah chunga kan umzui a tul thu leh chumi atan chuan CSR atangin plastic hlui hersawmna te ngaihtuah niin a tul anga ngaihtuah belh zel pawh an tum tur thu a sawi a. Cleanliness Week kan hman chhoh turah tihtur hrang hrang a la awm tih sawiin, mawhphurhna neitu zawng zawngte, Head of Offices te, khawtlang hruaitute chu thahnemngai taka an hma zawna hna te hlen theuh tum turin a chah bawk.

Serchhip District Urban Development Officer, Dr. Albert Vanlalliantluanga kaihhruai he hunah hian NULM-a Manager Lawmzuali chuan Azadi Ka Amrit Mahotsav (AKAM) hnuaiah hian Central Ministry chuan Faina lama hmasawn nan tih tur chi hrang hrang a ruahman tih sawiin, chung ruahmanna hnuaiah chuan Sanitation Worker tha thlanchhuah a nih thu te, Bawlhhlawh tih tlem kawnga hmalakna atan Waste to Art Exhibition siam anih thu te, Veng fai ber thlan leh faina lama hmala nasa Veng thlan te, Plastic tih tlem kawnga hma la nasa Veng te chawimawina lawmman siam anih te a sawi bawk.

Hei bakah hian tun thla ni 8 thleng hman tur Faina Hapta-ah hian thupui atan ‘Faina -Kan In leh a chhehvel atangin’ tih anih angin Chhung-kaw tinin an In leh a vel tifai tura beisei an nih thu leh SOP zawm chunga vengchhung leh kawng dung tihfai hnatlangpui neih tura ruahman anih thu NULM Manager chuan a sawi a. Bawlhhlawh paihna hmun lova paihte chu dan hmanga man theih niin dan bawhchhiate chu Rs. 200 chawi tir tur an nih tur thu te, Sawrkar Pisa, sumdawnna hmun leh Sakhaw hmun hrang hrang ah hnatlangpui neih tur a ni dawn tih a sawi a. Photography leh One Minute Mobile Video Competition buatsaih tur niin, Best News/Editorial Coverage chanchinbumite tan buatsaih a nih dawn thu a sawi bawk.

Inrinni-a he hun hmanna ah hian AKAM hnuaia inelna hrang hranga titha te hnenah lawm-man sem niin Town chhunga VC Area fai ber ah Chanmari Veng VC chu thlan an ni a, Faina kawnga hma la tha lawmman chu Serchhip Hmar Veng VC hnenah hlan niin Plastic hmang lo tura hma la tha ber lawmman chu Chhiahtlang North VC hnenah hlan niin Thuziak leh Rs. 5000/- theuh hlan an ni.

UD&PA Department hnuaia Sanitation Workers hnathawk tha thlanchhuah Hmeichhia-ah K. Kapthuami leh Mipa-ah Lal-rinngheta te hnenah Rs.3000 leh thuziak hlan an nih bakah Waste to Art Exhibition-a titha te hnenah lawmman sem niin R. Lalbiakhluni, Hmar Veng chu pakhatna niin R. Vanlalfela, New Serchhip chu pahnihna leh Lallianchhungi, Bukpui chu pathumna an ni a. UD&PA hnuaia Sanitation Workers te hnenah chawimawina hlan theuh an ni bawk.

He huna tel zawng zawngte hian Faina thutiam (Swachhta Pledge) chu chham rualin hming an ziahhnan bawk a ni.

Comments

Chhiar Hlawhte