Rod len zawng diklo lakluh khap turin sawrkar ngen

All Mizoram Cement & Iron Rod Dealers’ Association leh Mizoram Civil Engineers’ Association chuan Rod lenzawng diklo lakluh khap turin sawrkar an ngen tih an sawi.

Nimin khan Aizawl Press Club-a thuthar thehdarhtute an kawmna ah All Mizoram Cement & Iron Rod Dealers’ Association leh Mizoram Civil Engineers’ Association chuan kum 2019-a Central YMA-in Rod lei dan dik Chart an siam atangin hnamdang dawr te an hlawk ta lo nia sawiin, Rod Size tling lo, buk zang bawk si chu Company-ah hnamdang hoin an order leh thu leh heng Rod diklo te hi an lakluh leh tak thu an sawi a, sawrkar chu hetiang Rod len zawng diklo Mizorama lakluh khap turin an ngen tih an sawi a. Hnamdang dawr te chuan Mizoram sawrkara Chhiah an pek ngai loh thu leh bungraw rawn phurluh te a tam thei ang ber Mobile Checking tih a nih theihnana hma la turin Taxation Minister an ngen thu an sawi bawk.

He hunah hian AMCIRDA hruaitute chuan Survey an neih hnuhnun ber kum 2019-ah Aizawl khawpui leh a chhehvelah In sakna bungraw zuar 187 an awm thu leh chung zingah chuan Rod kawl tel dawr 120 an awm thu an sawi a. Heng zingah hian hnamdang thurualpui lo, Mizo dawr dik tak 25 awmin, tunhnaiah hnamdang dawr 30 chuang a awm belh leh tawh niin an sawi bawk.