Latest News

MSCPCR in an chhui zui dawn thu an sawi

Mizoram State Commission for Protection of Child Rights chuan rawngbawltu James Lalramliana, thil duhawm lo tak tia puh a nih chungchang ah a tuartu naupang nia sawi nihna tilang thei tur leh a nihna chhuizawn theih tur tidarh an awma an hriat thu leh Commission-in a chhui zui tur thu a sawi.

MSCPCR Commission Chairman Dr. C. Lalsangzuala chuan James Lalramliana chet dan chu tunkar Thawhtanni khan hriatchhuah a ni tih sawiin, Thawhlehni-ah Aizawl-ah chhukin hemi chungchangah hian Darlawn Police Station-ah FIR thehluh a nih avang leh Aizawl-a pana a chhuah  tawh avangin Child Rights Commission chuan Aizawl Police Station-ah a hriattir hnuah rang takin Aizawl PS an che nghal a, a tuk October ni 6 ah James Lalramliana hi Police ten an la ta tih a sawi.

Dr. C. Lalsangzuala chuan tunah hian he thilthlenga a tuartu naupang hriat mai theihna tur vawrhdarh an awm nia an hriat thu sawiin, hei hi Commission chuan a chhui zui ang a, a tul chuan dan angin hetiang titute chungah hma an la dawn tih a sawi a. Naupang nihna puandarh a nih chuan nakin zelah an nun a tihchhiat theih thu leh engmah pawi saklohna ah a tlak theih thu te, an nun zawng zawng a hniam theih thu te a sawi bawk.

James Lalramliana lakah hian POCSO Act hnuaiah thubuai ziahluh niin Lung In-ah khung a ni tawh nia thudawn a ni.

Comments

Chhiar Hlawhte