Prime Minister in Serchhip-a Oxygen Plant bun thar hawngin Health Minister hovin lo zawm ve a ni

PM-CARES Fund atanga ramchhung hmun hrang hranga PSA Oxygen Plant bun thar 35 te chu nimin khan Prime Minister Narendra Modi chuan AIIMS Rishikesh, Uttarakhand atangin a hawng a, heng zingah hian Serchhip District Hospital-a bun pawh telin a hawnna hun hi Health Minister hovin District Hospital Complex-ah lo hmanpui a ni.

India Prime Minister Narendra Modi hian PM-CARES Fund atanga ramchung hmun hrang hranga PSA Oxygen Plant bun thar hi biak hmuh theihna kaltlangin a hawng a, hemi hma hian minute 1-a Oxygen litre 250 siamchhuak thei Serchhip District Hospital-a PSA Oxygen Plant hi Health Minister Dr. R. Lalthangliana chuan ribbon chepchatin a hmunah a enfiah a, a hawnna puala inkhawm tawi neih chhunzawm ah Health Minister chuan hripui leng in min chim avangin hriselna lama hmanrua leh thawktu mamawhna a pung nasa hle tih sawiin,PM-CARES Fund kan hmuh hmain Mizoram in Oxygen Plant kan neih thatloh thu leh Covid hi awm lo se tuna kan dinhmun hi kan thleng lo ve thei tho tih sawiin, Sawrkarin hri dona kawnga hma a lakna te chu hripui len lai leh a reh hnu pawha kan ramin a tangkaipui tur a tam hle tih a sawi a, District tina RT-PCR dah turte leh Serchhip leh District danga hawn tak Oxygen khawl te leh hmalakna dangte chu hripui a reh hnuah pawh an tangkai chhunzawm hle zel dawn tih a sawi.

Health Minister chuan PM-CARES Fund atanga din District hrang hrang-a damdawi In leh ZMC bakah Cancer Hospital, a vaiin khawl thar 14 zingah Prime Minister in Serchhip Hospital ami a hawn atana a rawn thlang chu ropui a tih thu a sawi a, nimin-a Mizoram hmun hrang hranga PSA Oxygen Plant hawn thar 14 te Oxygen siam theih belhkhawm chu 6550 Litres per Minute (LPM) zet a nih thu a tarlang bawk.

Hripui leng dona atana sawrkar hmalakna te pawh sawiin Health Minister chuan ZMC-ah Khum engemaw zat dah belh a nih tawh thu leh ICU pawh khum 13 awm thin chu 34-ah tihlen a nih tawh thu a sawi a, Aizawl Civil Hospital ICU pawh nasa taka tihlen niin kumin ah la tihlen belh leh tum a ni tih a sawi bawk.

District hrang hranga RT-PCR Laboratory din tum chungchang ah vawilehkhat-a tih vek theih a ni lo tih sawiin, in nawr chuk chuk a tih theih a nih loh thu a sawi a. Serchhip chu District Hospital sak that mamawh ber ber te zing ami a nih thu pawh sawiin, 15th Finance Commission-ah Project lian tak siamin, sum erawh hmuh a nih tak loh thu leh kawng dang an zawn mek zel thu a sawi bawk.

He hunah hian Serchhip District Hospital-a Medical Superintendent mawhphurhna la mektu Dr. Lalnunhlima Khiangte chuan inlawmna thu sawiin COVID-19 hri leng thawhkhatna kan paltlang hnuah a thawh hnihna chu India rama kan Health infrastructure in min dawl zo ta lo hle tih a sawi a, a bik takin Oxygen indaihlohna nasa tak thlengin hemi phuhrukna atan hian Prime Minister Office atangin hmun tam takah Oxygen Plant bunin Serchhip-ah pawh bun a ni chu lawmawm a tih thu a sawi. Kum 1961-ah Serchhip District Hospital hi lo ding tan a ni tih pawh sawiin, tuna Main building pawh a tir ami ala nih thu a sawi a. Kum 2012 hnu lamah phei chuan Oxygen indaihlohna nasa tak an tawh thin thu leh Aizawl lamah pawh thla khat ah vawi tam tak Oxygen la tura an kal thin a tul thu te, April, 2020-ah Oxygen Plant te deuh, minute khat-a litre 80 pechhuak thei rawn bunin Outlet 40 chuang siamin harsatna tam tak a sutkian sak thu a sawi a. Tuna minute khat-a litre 250 siamchhuak thei hawn a nih leh takah phei hi chuan an Oxygen mamawh nasa taka a phuhruk tur thu a sawi bawk.

Nimin a hawn tak PSA Oxygen Plant hi September 19, 2021 khan Serchhip-ah rawn phurh thlen niin chhun zan zawma buaipui anih hnuah September 25, 2021 khan commission theih tura peihfel a ni a, Mizoram-ah peihfel hmasak ber nia hriat a ni.