Chanchin thar thenkhat :

NLM hmalakna tur thlirho

National Livestock Mission (NLM) State Level Executive Committee chu nimin khan an Chairman, Additional Chief Secretary JC. Ramthanga hovin CM Conference Hall-ah an thukhawm. NLM hmalakna kum 2014-2015 atanga kalpui hi kumin hian sawrkar laipui chuan a kalphung a thlak a, NLM hmalakna kalphung her danglam tak, kum 2021-2026 chhunga kalpui (implement) tura hmachhawp hrang hrangte nimin thutkhawm ah hian thlirho niin NLM hian a tum ber chu ranvulh a eizawngtute eizawnna in hlawk zawka hma a sawn theihna tur leh an eizawnna a lo ngelngheh zawk nan te, leh ranvulh atanga thil thar tihpun te a ni a. Hemi atan hian Sa, Kel hnute, Artui leh Beram-hmul tharchhuah tihpun chu hmachhawp hmasa zawk atan sawrkar laipui chuan a duang a ni.

Ran chaw up that dan zirho

Nimin khan Champhai-ah Project Management Unit (PMU) FOCUS Project, Aizawl leh AH&Vety Department tangkawp buatsaihin an District-a FOCUS Project hamthatna dawngtu Vawkvulhtute tan ran chaw atana hniam up that dan zirhona buatsaih a ni a, he hun hi Champhai DC Maria CT. Zuali chuan hmanpuiin Champhai District chu Vawk vulh tamna leh intodelh thei khawpa theihna nei a nih thu sawiin, ranvulh a eizawngte chu Vawksa mai bakah sa dangahte Mizoram chawmtu ni thei tura tanlak puiah a sawm bawk. He hunah hian FOCUS Project hamthatna dawngtu mi 18 te hnenah ran chaw channa khawl, Chaff Cutter hlan nghal an ni bawk.

Nomination Paper thehlut

Tun thla ni 30-a Tuirial Bial Assembly bye-election neih tura Zoram People’s Movement (ZPM) Ticket-a inthlanna chuh turin Laltlan-mawia, Kolasib chuan nimin khan he inthlanna a Returning Officer, Lallawmawma hnenah Nomination paper a thehlut a, he inthlanna chuh tura Nomination Paper thehlut hmasa ber a ni. Tuirial bial bye-election neih turah hian Vawiin hi hming pekluh hun hnuhnung ber a ni.

Congress in Campaign hawng

Congress Party chuan Tuirial bial Bye-Election neih tur atan nimin khan Kawnpui leh Lungdai khua ah Campaign hawnna an nei a, he hunah hian an Candidate Chalrosanga Ralte (Mavala) chuan Pathian leh Tuirial bial mipuite zara thlantlin a nih chuan kuthnathawktu, Tuirial bial chhung ngeia huan lo ram nei ve a nih angin Agriculture lamah nasa taka hmalak a tum thu a sawi a. “Bialtu MLA boral ta Pu Andrew H. Thangliana hmalakna te kha a ropui ka ti a, ka tling a nih phawt chuan a hma-laknate ka chhunzawm ngei ang,” a ti bawk.

Insawifiah turin hriattir

Tunhnaia Zoram Medical College (ZMC)-a contract-a thawk tur Staff Nurse 50 lak zingah Personal Interview hmachhawn lo leh Nursing Registration neih ngai nei si lote lak tel ni anga Social Media a thuthang a awm avangin Mizo-ram sawrkar-a Health & Family Welfare Department chuan ZMC Director chu insawifiah turin a ti a, a insawifiahna hi a rang thei ang bera Secretary, Health & Family Welfare Department hnenah thehlut tura hriattirna lehkha hi nimin chawhnu khan tihchhuah a ni.

MSU in chak zawka umzui zel an tum tih an sawi

Mizo Students’ Union (MSU) General Hqrs. Executive Meeting nimin-a neih chuan H&ME Department-in Staff Nurse a lakah thil fel lo a awm chu Department hnathawktute inthlahdah leh fimkhur tawk loh vang ah an ngai tih sawiin, hemi chungchanga hma an lo lak tawhna chu chak zawka umzui zel nise an ti a. Thil tisualtute hrem an nih ngei theih nan Department Inquiry Commission a rang thei ang bera din a, sawrkar nawr nise an ti bawk. Hei bakah hian MSU chuan Result cancel vanga COVID-19 dona kawnga harsatna a awm loh nan Voluntary Nurse te thawk-rim lehzual tura ngen relin, Nurse lâk tharna kawngah duhsak an nih ngei theih nan chak zawka hmalakpui zel turin thu dah an dah bawk.