National Deworming Day hawnna neih a ni

National Deworming Day, 2021 chu nimin khan Health Minister Dr. R. Lalthangliana chuan Internet kaltlangin a hawng.

National Deworming Day, 2021 hawnna hunah hian Health Minister chuan naupangte an thanlen kawngah hriselna tha an neih theih nan sawrkarin kawng hrang hrangin hma a lak thu leh, chung zinga pawimawh tak pakhat chu rulhut laka naupangte fihlimna hi a nih thu a sawi a. Kumdang ah chuan National Deworming Day hi Sikul leh Anganwadi Centre-ah te ni khatah hman thin a nih thu leh tun tumah erawh chuan COVID-19 hripui vanga Sikul leh Anganwadi Centre te khar a la nih avangin he programme hi hman a remchang ta lova. Chumi avang chuan ni khat chauh a hmang lo in National Deworming Day hi kar hnih chhung, October ni 18 atanga October 30, 2021 hian hman a ni dawn tih a sawi bawk.

Naupang leh tleirawl zawng zawngte rulhut laka an lo fihlim theih nan National Deworming Day hi India ramah kum 2015-ah khan State/UT 11-ah bultan a ni a, a hlawkna te hmuh a nih hnuin India ram pumah February 2016 atang khan hman niin Mizoram-ah pawh hma kan sawn chho ve zel a, round hnuhnung ber, February 2021-a neih ah khan naupang kum 1 atanga kum 19 inkar 97.9% laiin he damdawi hi an ei thei a ni.

National Deworming Day (NDD) hi Mizoram District zawng zawngah a ruala hman a ni dawn a, naupang leh tleirawl kum 1-19 huamin a thlawnin Rulhut Hlo (Albendazole) eitir thin an ni a. Naupang leh tleirawl kum 1 - 19 inkar ten kim taka rulhut hlo an ei theih nan National Deworming Day hi kumin ah chuan kar hnih chhung hman a ni dawn a. Hemi hun chhung hian In tinah ASHA te kalin Albendazole hi an pe dawn a. Rulhut pai avanga thisen tlakchhamna leh taksaa harsatna hrang hrang awm theite venna atan National Deworming Day hi hman thin a ni.