All Mask Campaign kalpui chhunzawm dawn

Health Minister Dr. R. Lalthangliana chuan Hmai tuamna vuah tura beihpuithlakna ‘All Mask Campaign’ hman lai mek chu tun thla tawp thlenga kalpui tura pawhsei a nih thu nimin khan a sawi.

Health Minister ho hian nimin khan District tina Deputy Commissioner te, Chief Medical Officer (CMO) te leh District Information & Public Relations Officer (DIPRO) te chuan Virtual Meeting neiin he hunah hian Health Minister chuan he thu hi a sawi a. COVID-19 dona kawnga hmalakna kawng hrang hrangah leh mipuite hnena zirtirna kawng hrang hranga kalpui chungchang ah District tina Bawrhsap te leh DIPRO ten Health Department hmalakna tha taka an thlawp thin avanga lawmthu sawiin, Hmai tuamna vuah tura beihpuithlakna, All Mask Campaign chungchanga an hmalakna ah lawmthu a sawi a, “Kan dinhmun thlirin Mask vuah tura inzirtirna chu ngawrh lehzuala kalpui a tula hriat a ni a, hei vang hian All Mask Campaign hman lai mek October ni 20, 2021 a tawp tura tih chu October ni 31, 2021 thlengin kan pawtsei leh a, hetih chhung hian ngawrh lehzuala mask vuah a him zia kan inzirtir a tul dawn a ni,” a ti a. State Level All Mask Campaign Implementation Team sawrkarin a din thu leh anni hian ruahmanna thar an rawn siam tur thu a sawi bawk.

Health Minister chuan khawvel leh India ram State dangte kalpui dan leh WHO, CDC-USA leh ICMR te ngaihdan zirchiangtu State-Level Expert Team on COVID-19 Management rawtna angin symptom-based approach-a Sample Test kalpui turin order tihchhuah thuai a nih tur thu a sawi a, hemi chungchangah hian mipuite leh khawtlang hruaitute hrilhfiah kawngah nasa taka tan lak a ngai tih a sawi a. Inchhungkhura natna khirhkhan veite leh kum upa, tar chaklo neite fimkhur pui leh venpui a ngaih zia uar takin a sawi bawk.