Lengpui Airport-ah Alliance Air service tan

Nimin atang khan Alliance Air chu Mizoram-ah Service tanin Aizawl, Shillong, Guwahati leh Kolkata te a thlunzawm dawn a ni.

Alliance Air Service thar Flag-off hun hi nimin khan Delhi atangin Union Minister of Civil Aviation Jyotiraditya M. Scindia leh Union Minister for State for Road Transport & Highways and Civil Aviation Gen. Dr. VK. Singh hovin neih a ni a, Mizoram atangin Health Minister Dr. R. Lalthangliana leh Sports Minister Robert Romawia Royte te an tel bawk a, Lengpui Airport-ah Dy. Controlller, Aviation and Airline Official Lalsangpuia leh AAI Airport incharge Malik te'n he hun hi an lo hmang bawk a ni.

Nimin-a he hun hmanna ah hian Union Minister for Civil Aviation Jyotiraditya M. Scindia chuan sawrkar laipuiin India hmarchhak State-te a ngaihsak thu leh, tuna flight connection thar siam hian chu chu a entir thu a sawi a. Mizoram chu India leh Asia chhim chhak ramte thlun-zawmtu State pawimawh tak a nih thu a sawi a. Lengpui Airport chu passenger mai bakah Cargo phur Thlawhna tum hmun tihchangtlun tura Ministry in a identify zingah a tel thu a sawi bawk.

He hunah hian Union Minister of State General Dr. VK. Singh chuan Alliance Air kaltlanga Mizoram tana Air Transport tih changtlun belh zel a ni chu a lawmpui thu a sawi a. Air connectivity tha zawk siam belh turin Alliance Air mai bakah Airlines dang pawh Lengpui Airport thlunzawm turin hma lak zel tum a nih thu a sawi.

Health Minister Dr. R. Lalthangliana chuan Regional Connectivity Scheme (RCS) kaltlanga sawrkar laipuiin Mizoram-ah Flight Connection thar a siam chu lawmthu a hrilh a. Kawngpui a ni emaw, Thlawhna leh Rel a ni emaw, inkalpawhna tha leh ram hmasawnna hi a kal kawp tlat tih sawiin, India ramah Thlawhna Service bultan a nih atanga la awm ngailo, Mizoram leh Meghalaya inkar Direct Flight siam a ni ta chu lawmawm a tih thu a sawi bawk. Sports Minister Robert Romawia Royte pawhin Alliance Air in Lengpui Airport a rawn thleng chu Regional Air Connectivity tihhmasawn tura a hmalakna pakhat a tihhlawhtlinna chhinchhiah tlak tak a ni tih sawiin, Aizawl leh Shillong inkar direct flight a awm ta chu chanchin lawmawm tak a nih thu leh State pahnih mai bakah Guwahati leh Kolkata nen thlunzawm a, khawpui pali chatlak lo a thlawhna service awm ta chuan hmasawnna nasa tak a thlen ngei a beisei thu a sawi.

Alliance Air thlawhna hi ATR72 a ni a. Kolkata leh Aizawl inkar thlawkin, a kar lakah Guwahati leh Shillong a tlawh a. Thawhtanni, Thawhlehni, Ningani leh Inrinni-ah te a thlawk dawn a ni. Alliance Air hi Air India Limited Subsidiary company a ni a, India ram chhungah a service a ni.