Latest News

Mizoram-ah hri kai 97,732 hmuhchhuah an ni ta

Mizoram-ah COVID-19 hri kai 97,732 zet hmuhchhuah an ni tawh a, Inrinni khan Sample 7353 enfiah leh niin heng atang hian hri kai 1276 hmuh leh niin Sample enfiah zawng zawng atanga zaa 17.35 te chuan hri an kai a ni.

Inrinni khan ZMC-a RT-PCR Laboratory-ah Aizawl leh Mamit District atanga Sample lak 2336 enfiah niin heng atang hian hri kai 474 hmuh an ni a, an vai hian Aizawl District atamga Sample lak vek an ni a, Veng leh khua 71 ami te niin Mission Vengthlang-ah hri kai mi 46 zet hmuh niin Sesawng khua ah hri kai mi 27 leh Sakawrtuichhun ah 26 hmuh an ni. Fluorescent Immunoassay Test hmangin Inrinni khan Aizawl District-ah Sample 161 enfiah niin hri kai mi 27 hmuh an ni bawk a, an vai hian Aizawl District ami te vek an ni bawk.

District hrang hrang 11-a TrueNat Laboratory awm zinga Laboratory 7-ah Inrinni khan Sample 309 enfiah ni bawkin hri kai mi 59 hmuh an ni bawk a, an zinga 21 te chu Champhai District ami te niin Lawngtlai District-ah 16, Lunglei District-ah 15 leh Serchhip District-ah hri kai mi 7 hmuh an ni.

Rapid Antigen Test hmangin Mizoram hmun hrang hrangah Sample 4547 enfiah ni bawkin heng atang hian hri kai mi 716 hmuh an ni bawk a, an zinga 303 te chu Aizawl District ami te niin Lunglei District-ah 116, Champhai District-ah 81, Mamit District-ah 74, Siaha District-ah 63, Serchhip District-ah 33, Lawngtlai District-ah 19, Kolasib District-ah 16, Khawzawl District-ah 8 leh Saitual District-ah hri kai mi pahnih hmuh an ni bawk.

Mizoram-a hri kai hmuhchhuah an pun mek laiin enkawl dam pawh an pung ve zel a, Inrinni khan hri kai mi 1481 zet enkawl dam niin nimin khan tlai dar 5:00 thlengin hri kai mi 944 te enkawl dam an ni leh bawk a. Heti hian nimin tlai dar 5:00 thlenga Mizoram-a hri kai hmuh tawh chu 97,732 niin an zinga 82,206 te chu enkawl dam an ni tawh a, hei hi hri kai hmuhchhuah atanga chhutin za zela 84.11 a ni a, tunah hian hri kai enkawllai 15,207 an la awm mek a ni.

Mizoram-a hri kai zingah mi 319 an boral tawh :

Mizoram-a COVID-19 hri kai zingah mi 319 zet an boral tawh. Inrinni chawhma dar 10:00 khan Major Lalhruaikima (55), Salvation Army Officer, Thingfal-a awm chu Lawnglai-ah COVID-19 vangin a boral a, Inrinni chawhnu dar 2:15 khan Lalremruati (16), Ramhlun South Aizawl chu boralin zan dar 10:00-ah HC Laltluanga (75), Serchhip IOC Veng chu a boral ve leh a ni. Nimin zing dar 6:50 khan Kapthangi (75), Chawnpui, Aizawl chu boralin Khuahluma (75), Zokhawthar pawh nimin zing dar 8:00 khan a boral ve leh bawk a, Mizoram-a hri kai hmuh atangin zaa 0.32 an boral tawh a ni.

Comments

Chhiar Hlawhte