Mizoram-ah COVID-19 hri kai 901 hmuh belh leh

Niminpiah khan Mizoram-ah Sample 6945 enfiah niin heng atang hian hri kai 901 hmuhchhuah an ni a, Sample enfiah zawng zawng atanga chhutin za zela 12.97 te chuan hri an kai a ni.

Niminpiah khan ZMC-a RT-PCR Laboratory-ah Sample 1007 enfiah niin heng atang hian hri kai mi 190 hmuhchhuah leh an ni a, an vai hian Aizawl District-a Sample lak te niin Veng leh khua 43 ami te an ni a, hri kai hmuhchhuah tamna ber Mission Vengthlang-ah hri kai hmuhchhuah 31 awmin hri kai hmuh hi an tlahniam hret a ni. Fluorescent Immunoassay Test hmangin Aizawl ah hian Sample 51 enfiah ni bawkin heng atang hian hri kai mi 16 hmuh an ni bawk a, an vai hian Aizawl khawpui chhung ami te an ni bawk.

District hrang hranga TrueNat Laboratory 11 zingah Khawzawl leh Hnahthial tihloh District dang zawng atangin Sample 355 enfiah ni bawkin heng atang hian hri kai mi 85 hmuh an ni leh bawk a, heng te hi Champhai District atangin 27, Siaha District atangin 24, Lunglei District atangin 12, Kolasib District atangin 10, Serchhip District atangin 7, Aizawl leh Saitual District atangin mi pahnih ve ve leh Lawngtlai District-ah mi pakhat te an ni.

Heng bakah hian District hrang hrangah Rapid Antigen Test hmangin Sample 5532 enfiah niin hri kai mi 610 hmuhchhuah an ni bawk a, an zinga 228 te chu Aizawl District ami te niin Lawngtlai District-ah 69, Lunglei District-ah 65, Serchhip District-ah 64, Mamit District-ah 53, Siaha District-ah 52, Champhai District-ah 48, Kolasib District-ah 15, Khawzawl District-ah 7, Saitual District-ah 6 leh Hnahthial District-ah mi 3 te an ni.

Nimin khan Mizoram hmun hrang hrang atangin hri kai mi 905 te chu enkawl dam niin anmahni enkawlna hmun atanga chhuahtir an ni ve leh a. Heti hian nimin tlai dar 5:00 thlenga Mizoram-a hri kai hmuh tawh chu 1,10,719 niin an zinga 97,649 te chu enkawl dam ni tawhin hei hi hri kai hmuhchhuah atanga chhutin zaa 88.2 a ni a, tunah hian hri kai enkawllai 12,694 an la awm mek a ni.

Hetihlai hian nimin thleng khan Mizoram-a hri kai zingah mi 378 zet boral tawhin chhinchhiahna atanga a lan danin nimin khan hri kai te zingah mi 4 boral an awm a, midang pahnih hi a hma ni ami te an ni.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man