Chanchin thar thenkhat :

Raltlan ten zirna chhunzawm

Myanmar atanga raltlan Mizoram chhunga awm School naupang zingah mi 1735 te chuan State chhung School hrang hrangah zirna an chhunzawm tih School Education Department Director James Lalrinchhana chuan a sawi. School Education Department Director sawi danin raltlante dinhmun a zirin zirna chhunzawm zat hi a danglam reng a, thenkhat an awmna a let leh an awm laiin thenkhat lokal belh an awm reng thung a, tun dinhmunah Champhai District-ah School hrang hranga raltlan admit tam berin 579 an awm a, Lawngtlai District in dawtin 539 an awm a, Hnahthial District-ah 327 an awm bawk a, District dangah pawh an awm bawk. Heng raltlan te hi anmahni kum mil leh anmahni milpui anga zirna an chhunzawm theih nan hmalak a ni a, Mizoram-a School naupang ten zirna an dawn ang te leh tanpuina hrang hrang an dawn ang te an dawng ve vek bawk a ni.


Khawzawl DISHA thukhawm

Khawzawl District tana District Development Coordination and Monitoring Committee (DISHA) thutkhawm hmasa ber chu Oct. 14, 2021 khan Video Conferencing hmangin neih a ni a, he thutkhawm hi an Chairman leh Lok Sabha MP C. Lalrosanga hova neih a ni. He hunah hian Khawzawl District-a khaw 38-ah MG-NREGS Job Card 8472 a awm thu leh ni 58 inhlawhna siam a nih tawh thu te, PMAY-G ah In sakna dawng tur 719 thlang tawhin In 51 sak zawh a nih tawh thu leh hmalakna dang dang te tarlana sawiho a ni.


SEDP-ah hmalak tum

MNF Party Adviser Dr. R. Lalthangliana chuan nimin khan Lungdai, N. Chaltlang, Bukpui, Lungmuat, Nisapui, Serkhan, Zanlawn leh Hortoki-ah khawtlang hruaitute kawmin SEDP chu a theih chen chenah hma an la zel ang tih a sawi a, “Budget thar lo awm turah chuan SEDP lam hawia kalin, tihhlawhtlina kalpui ngei kan tum mek a ni,” a ti.


CEC in CCC koh an rel

Central YMA-a Central Executive Committee (CEC) chu nimin khan thukhawmin kumin-a YMA General Conference chungchang ah zau zawka inrawnkhawm tha tiin Nov. 10, 2021 khian Central Coordination Committee (CCC) koh nise an ti a. Kumin hi Central YMA hruaitu thlan kum a nih avangin mawhphurtu tur pawh inruat nghal a ni a, Returning Officer-ah President nilai Van-lalruata chu ruat a nih bakah Asst. RO atan J. Lalsailova CEC; Secretary-ah Joseph Vanlal-hruaia Sailo, CEC leh Asst. Secretary-ah J. Lalsang-liana CEC te ruat an ni. Hei bakah hian Halpuah, halmawi leh Sky Lantern chu mihring hriselna tichhe thei a nih avangin hetiang khap kawnga hma la turin Sub-Hqrs./Group/Branch YMA ngenin, Silai lem, a mu kap chhuak thei chungchangah pawh hma la turin an ngen bawk.


Dy. CM in sawrkar laipui dawr

Deputy Chief Minister Tawnluia chuan niminpiah khan Ministry of Jal Shakti leh Ministry of Housing & Urban Affiars-a Secretary te chu hmuin Department thil pawimawh te a sawipui a. Jal Ministry-a Secretary Pankaj Kumar-a hnenah Jal Jeewan Mission chak zawka kalpui a nih theih dan tur leh Sanction hmabak te a hma lama lo bawhzui turin a chah a. Mizo-ram khaw thenkhat a Rainwater Harvesting Project proposal te a sawipui bakah Tlawng River Rejuvenation leh Reiek Water Harvesting Dam project te a sawipui bawk. Hei bakah hian MoHUA-a Secretary Durga Shanker Mishra hnenah PMAY Housing For All hnuaia Ministry atanga Sanction hmabak te chak zawka Mizoram in a hmuh theih nan bawhzui turin a chah bawk.

Comments

Popular News (Last 30 Days)

Serchhip DCSO sawn a ni