Latest News

Mizoram-ah Brahmaputra Board hma rawn la ve tura duh thu thlen

Mizoram-a lui hrang hrangte humhalh leh tangkai zawka hman kawngah Brahmaputra Board in hma rawn la ve se a duh thu L. Thangmawia MLA chuan a sawi.

Nimin-a High powered Review Board of Brahmaputra Board thutkhawm vawi 11-na Union Jal Shakti Minister Gajendra Singh Shekhawat-a hova Guwahati-a neih ah he thu hi sawiin L. Thangmawia chuan, Mizoram tui hmuhna hnar pawimawh te chu ruahtui (rain water), lei hnuai tui (ground water) leh lui (river) te an ni tih a sawi a. Tun dinhmunah Rain Water Harvesting lamah tan lak a la ngaih thu leh sawrkar laipuiin Mizoram Sawrkar ruahmanna te a tihhlawhtlin sak a tul thu a sawi a. Tuna Mizoram tuilakna pawimawh tak pakhat, Ground Water lamah pawh Mizoram Sawrkarin Work Plan 2019-22 leh 2022-24 atana cheng nuai 21793.50 a siam pawh sawrkar laipuiin lo ngai pawimawh se a duh thu a sawi a ni.

Mizoram chhunga an hmalakna hrang hrang avangin Jal Shakti Ministry thuneitute hnenah L.Thangmawia chuan lawmthu sawiin, tuna Mizoram leh State hrang hrangin kan mamawh chu tuihna humhalh a nih thu leh Mizoram sawrkar pawhin Central YMA te nena thawkho in inzirtirna leh a theih anga hmalakna a kal pui mek thu a sawi a. Brahmaputra Board chuan Mizoram-a lui hrang hrangte humhalh leh tangkai zawka hman kawngah hma rawn la ve se a duh thu sawiin, hetiang kawnga hmalak a nih loh chuan tui lakna project leh khawl tha tak tak awm mahse, hun lo kal zel turah mipui mamawh tawk tui lak tur a awm lo thei dawn a ni, a ti bawk.

Mizoram-a lui sei ber, Tlawng lui chu Mizoram nunna hnar pakhat a nih thu sawilangin L. Thangmawia chuan, PHE Department-in Rejuvenation, Protection and Management of Tlawng River tih concept an siam chu Brahmaputra Board atangin emaw, Jal Shakti Ministry atangin emaw tihhlawhtlin sak ngei a tul thu a sawi bawk a ni.

Comments

Chhiar Hlawhte