Latest News

Mipui tan hlauhthawn tur a awmlo tih sawi

Mizoram State Health Care Society (MSHCS) Chief Executive Officer Dr. Biakthansangi chuan State Health Care Scheme hnuaiah Bill tang then rih mahse Bill thehlut tawh ten an hmu ngei dawn a, hlauhthawnna tur a awmlo, a ti.

Dr. Biakthansangi chuan COVID-19 hrileng avanga sawrkar sum harsatna avangin Health Care Scheme-a Bill lut te an pechhuak zung zung theilo mahse bill la hmu lo ten an hmuh ngei theih nan sawrkarin a mawhphurhna a hlen chhuak ngei dawn tih a sawi a, Mizoram State Health Care Scheme Policy hman mek chu thla kalta September thla a tawp rual khan tawpin, kumthar March thla thleng hman turin inziahluh leh hun hawn leh mek a ni tih a sawi a, October ni 11 atanga bultanin December ni 10 thleng a inziahluh theih a ni a, thla 6 chhung hman tur niin BPL tan Rs. 50 leh APL tan Rs. 500 inziahluh man lak a ni tih a sawi bawk.

Mipuite chu Health Care Scheme-a inziaklut tura sawmin, hun hawn mek hi hmang tangkaia hunbi tiam a pelh hma ngeia inziaklut ngei turin a sawm a, December ni 11 hma-a inziaklut te chu hemi hma October ni 1 hnu lama damdawi In-ah an awm anih chuan an bill thei vek dawn tih a sawi bawk.

Dr. Biakthansangi chuan sawrkar laipui duhdan angin kumthar atang chuan Mizoram State Health Care Scheme chu sawrkar kum chhiar angin Policy khat kalpui ani tawh dawn tih a sawi a, kumthar 2022 April thla atanga a kumleh March 2023 thleng awh tur ani tawh dawn a, kum thar Policy atana inziahluh hun chu February emaw, March thla emaw hawn anih a beisei tih a sawi bawk.

Comments

Popular News (Last 30 Days)