MAHFED sum hman dan a felhlel niin hria

ZPM Party chuan Mizoram State Agriculture/Horticulture/Forestry & Marketing Cooperative Federation Ltd. (MAHFED) hmalak dan leh an sum hman danah thil felhlel tam tak a awm nia a lan thu an sawi.

Inrinni-a thuchhuah an siamah ZPM Party chuan MAHFED hi Mizoram Cooperative society Act, 2006 hnuai a in register niin RTI hmanga zawhna chhanna atanga a lan danin sum pawh an hmu thain an hmalak dan leh chutihlaiin an sum hman dan te enin thil fel lo tam tak a awm tih hmuh a ni tih an sawi a. Ministry of Tribal Affairs atangin Institutional Support for Development and Marketing of Tribal Product/Produce Scheme hnuaiah Rs. 6,96,00,000/- dawngin, he Scheme atang hian Saff hlawh leh Allowance atan Rs. 51,50,635/- an hmang nia sawiin, he pawisa hmanna hrang hrangah thil fel lo a lang nual niin an sawi a, tunah hian Bairabi-ah Warehouse cheng nuai 274 senna tur sak tum mek niin hei pawh hi enchian ngai tak niin heti zat warehouse sak nan a sum sen hi a ngaiin a lang lo niin an sawi bawk.

Hei bakah hian he pawl hian anmahni dan siam, bye-laws leh MCS Rules kalhin Rs. 195,00,000/- lai mai member ni lo hnenah a pung awmin a puktir bawk nia sawiin, Federation Chairman in Bolero a lei dan te, Audit Report-ah mimal senso thlenga an rulh sak thin tih hriatchhuah te, Board of Director (BoD) Meeting vawi 7 neihna atana Rs. 1,01,419/- sen a ni te, BoD member Honorarium atana Rs. 1,82,000/- lai sen a ni te leh Chairman leh Vice Chairman honorarium atana Rs. 2,47,618 lai sen a ni te chu enchian ngai nia a lan thu an sawi bawk.