COVID-19 vanga thi te ralna pekchhuah thuai beisei niin Ex-Gratia erawh a tlai hret dawn

Supreme Court thupek anga COVID-19 vanga thi te ralna sum chu Mizoram sawrkar chuan pek chhuah thuai a tum.

Finance Department hotute chuan COVID-19 vanga thi te ralna sum, mi pakhat ah Rs. 50,000/- chu pekchhuah theih thuai an tum tih an sawi a. Sanction pawh peih tawh anih thu sawiin, tuna lut ang ang chu an dilna a felfai anih chuan pek turin an ruahman tawh niin an sawi a. Ralna sum hi a buaipuitu District tina DC te hnenah pek a ni dawn tih pawh sawiin, Covid vanga thi te ralna hi sawrkar laipui National Disaster Response Force sum atanga State sawrkarin a pek tur nia thudawn a ni.

Hetihlai hian LLTF/VLTF member, COVID-19 vanga thi te Ex-Gratia Compensation Scheme hnuaia cheng nuai 20 pek tur chu tlemin hun a la duh deuh dawn niin an sawi thung a. “Task Force te ralna tur buaipuina ah hian tih tur neuh neuh a la awm deuh a. DM&R Department-ah kalin sanction te tihfel anih hnuah Treasury kaltlang leh phawt a ngai dawn a ni,” an ti a. LLTF/VLTF member te ralna chungchang hi tunhnai khan Claim Approval Board Chairman Ramchuana, Addl Secretary Finance, Task Group on Insurance Chairman ni bawk hoin an ngaihtuah a. Dilna 5 lut awmin Aizawl District atanga Claim awm pathum zinga pahnih chu an approve a, pakhat hi document tihchian ngai a la awm avangin approve a ni lo a. Champhai leh Kolasib District atanga Claim pakhat ve ve dawn pawh document la fel tawk lo a awm avangin pawm a ni lo a. Hengte hi document kimchang awm hunah la ngaihtuah leh tur a ni. 

COVID-19 vanga thi te ralna sum dil hi Aizawl District-ah mi 95 awm tawhin dilna a thiltel ngai leh document felfai te chu Committee in an enfel hnuah pek turin thuneitu sang zawkah an thlen a. Dilna felfai lo te erawh an thawnlet leh a ni. District hrang hrangah COVID-19 vanga thi te ralna endik tur hian Committee din a niin Addl. DC chu Chairman an ni a, an District chhunga Chief Medical Officer leh Medical Superintendent te chu member an ni bawk.

Health Secretary Lalramnghaka chuan tunhnaia chanchinbumite nen an inkawmna ah COVID-19 vanga thi, ralna dawng thei tur te chu COVID-19 an vei a ni tih hriat atanga ni 30 chhunga thi te leh hemi hnuah pawh damdawi In-a inenkawl zui ni 30 thleng chu COVID-19 vanga thi ah pawm an ni tih a sawi a. Hetihlai hian COVID-19 vei pawh nise Tur ei, inawkhlum, misual kut tura, accident leh engemaw rikrum thil vanga thi te chu a huam dawn lo niin a sawi.