Party ten Election dan leh thuthlung bawhchhiat vangin Election thuneitu lamah MPF an zualko dawn

Mizoram People Forum (MPF) General Hqrs. chuan October 30, 2021-a Tuirial Assembly Constituency bye-election lo awm turah an thu dawn te leh Social Media lama Video darh te avangin Election Commission of India (ECI) thlenga zualko an tum a, an hmalakna hmasa ber atan Mizoram Election thuneitu te hnenah ziakin an thlen dawn.

Inrinni-a thuchhuah siama an tarlan danin MPF General Hqrs. chuan Tuirial Assembly Constituency bye-election lo awm turah inthlanna fel fai leh thianghlim a awm theihna turin theihtawpin hma an la tih tarlangin, hetihlai hian tunhnaiah Party hrang hrang ten campaign an kalpui danah ECI in Model Code of Conduct a siam leh Thawhhona thuthlung te kalha hmalak a awm tih an hriat thu leh pawi an tih thu an sawi a. TV Special Report leh Video Clip hrang hrang atanga a lan danin sum leh therhlo hmanga vote zawn te, buh inphurh sak te, a thlawna Ration buhfai sem te leh JCB hmanga lei laih sak te leh ruaitheh te a awm nia hriat a nih thu an tarlang a. Hetiang hi Model Code of Conduct in a phalloh (corrupt practice) leh party te nena thawhhona thuthlung kalh a nih avangin thuneitute hnenah hma la turin an thlen tawh tih sawiin, hetiang hmanga vote zawng lo tur leh thianghlim taka campaign kalpui turin Candidate te leh Party Worker te an ngen thu an thuchhuahah hian an tarlang bawk. 

MPF Gen. Hqrs chuan mipuite pawh Candidate te ti hautak lo zawng leh Thawhhona thuthlung pel zawnga beisei neilo turin an ngen a. Bial chhung khawtina MPF Local Forum leh Constituency Forum te pawh theihtawp chhuaha Thawhhona thuthlung hre renga vil tur leh mitmei reng turin an ngen thu an sawi bawk.

MPF hruaitute chuan tun tum inthlanna neih turah hian khaw tin an tlawhchhuah tawh thu leh Political Party tin Candidate te pawh an kawm tawh thu an sawi a. Social Media mai bakah khaw hrang hrang atangin ECI in Model Code of Conduct a siam bawhchhe zawnga hmalakna thlalak te pawh an dawng tih a sawi a, Party tin te chuan thawhhona thuthlung an bawhchhe deuh vek tawh nia sawiin, BJP chu hetiang lamah sawi la kai lo leh complain an la dawn loh awmchhun a ni tih an sawi bawk.