Latest News

Congress Party huaihawtin Aizawl-ah ‘Dikna tungding tura beihna’ hun hman a ni

Congress Party huaihawtin nimin, Oct. 15, 2021 khan Aizawl-a Vanapa Hall kawt-ah Zoramthanga Corruption case chungchanga Dikna tungding tura beihna hun hman a ni.

MPCC General Secretary John Siamkunga kaihhruaia he hun hmanah hian MPCC Spokesperson & Media Chairman Dr. Lallianchhunga chuan kum 10 chhung leka Chief Minister Zoramthanga hausakna cheng nuai 138 atanga nuai 838.41 zeta a pun hman avang leh, a sum lakluh zat leh a hausakna a inmil theih ngang loh avangin June 22, 2007-ah ACB-ah PRISM chuan FIR an thehlut tih sawiin, chhui phalna pek a nih lawk loh avangin Oct. 10, 2007-ah High Court-ah PIL an thehlut zui ta niin a sawi a. Kum thum hnu, kum 2010 September 15-ah Zoramthanga lakah thubuai thehluh niin, a huan, Aii Puk-a sawrkar bungrua hmanga puhna thubuai siam a ni ta bawk tih a sawi.

MPCC Spokesperson chuan Zoramthanga hian Bank hrang hrang 9-ah amah leh a chhungte hmingin account 21 an nei nia sawiin, Life Insurance-a an sum dahte nena an pawisa neih zawng zawng hi cheng nuai 441.32 niin a ram leh bungraw dang tam tak neihte hlutna hi cheng nuai 625.50 a ni bawk tih a sawi a. ACB-in Court-a Supplementary Charge Sheet an thehluh atanga a lan danin Zoramthanga sum neih zawng zawng hi cheng nuai 909.70 niin thubuai rei tak ngaihtuah a nih hnuah heng a pawisa neihte hi a unaupa L. Nghakliana leh a u fapa Zoramchhana ten an sum an kawltir niin an sawi leh ta niin a sawi bawk.

He hunah hian AMC Councillor Rosiamngheta chuan Unaute sum kawl anga insawia thiamchanna kan dap ta chu a zahthlak takzet tih sawiin, diknain ro a rel theihna tura hma kan lak a ngaih thu a sawi a. MPCC PAC Member KS. Thanga pawhin thil dik lo tarlan a, siamthat tuma beih chu Party te tih turah an ngai tih sawiin, “Pu Zoramthanga leh a unaute hian Pathian hnenah thinlung leh tih takzetin thupha chawi rawh se,” a ti bawk.

Comments

Popular News (Last 30 Days)