P&E Minister in Sihmui-a Refugee Relief Camp a hmunah tlawhin an dinhmun a enfiah

P&E Department changtu Minister R. Lalzirliana chuan Sihhmui Refugee Relief Camp chu nimin zing khan tlawhin Camp leh a chhehvel chhit enna tura ama sum hmanga a lei, Solar Home Lighting Set 4 a pe a, Aizawl DC chuan Humanitarian Relief atan a tul ang anga hman tur pawisafai chu VCP hnenah a hlan bawk.

P&E Minister chuan Mizorama  raltlan rawn lut kan State hmun hrang hranga awm mek te chu kan unaute an nih angin Mizoram mipuiten kan chhawmdawl mek a. Raltlante pawhin Democracy an duh avanga an tuarna te chu a thlawn mai dawn lo tih an hriat reng a pawimawh thu a sawi a, tuna an harsatna avanga an rilru ti hnual lo tur leh tuarchhel tura chahin, an mamawh leh an harsatna ah chuan Mizoram mipui ten theihtawp chhuah an inhuam reng a ni, a ti. Sawrkar laipuiin raltlante humhim a thlawp chiah lo mai thei naiin kan unaute tan Chief Minister huaisen leh raltlan te dinhmun hrechiang em em tu a tang tlat tih P&E Minister chuan sawiin, kan unaute humhimna beiseia Mizorama rawn lutte chu thlaphang miah lo tur leh an awmna hmun apiangah anmahni lo tuamhlawmtu khawtlang hruaitute rorel dan te tha taka zawm a, an zai  ngai chang thin turin a chah bawk.

He hunah hian bialtu MLA Zothantluanga leh Aizawl DC Dr. Lalhriatzuali Ralte te pawh kalin District Bawrhsap chuan sum leh tanpuina phut miah lova raltlante lo tuam hlawmtu Sihhmui khawtlang hruaitute leh khawtlang mipuite tlawm-ngaihna chu ropui a tih thu sawiin, a tir lamah DC Office lamin Refugee Camp a awm thu an hriat loh thu leh an hriat hnuah Humanitarian Ground atanga Refugee Camp a awm mek te mamawh ngaihtuah tan a nih thu a sawi a. A buaipui turin Senior Officer pakhat chu Nodal Officer atan ruatin, Electric Current leh Tui Connection chu mamawh hmasak ber a nih thu leh ruahmanna siam chhoh mek a nih thu a sawi bawk.

Tunah hian Sihhmui-ah hian Refugee Camp hmunkhat aia tamah a awm a, helai hmuna awm te hi an insawnkual thin avangin an zat chiah hi hriat theih a ni rihlo a. Nimin-a helai hmuna kal bialtu MLA Zothantluanga hian Buhfai, chawhmeh leh hriak engemaw zah a pe hlawm bawk a ni.

Comments

Popular News (Last 30 Days)

Serchhip DCSO sawn a ni