Latest News

Chanchin thar thenkhat :

DoNER Minister hmu

Chief Minister Zoramthanga tirhin Inrinni khan Mizoram Lok Sabha MP C. Lalrosanga, Rajya Sabha MP K. Vanlalvena leh OSD to Chief Minister Rosangzuala te chuan Union Minister of DoNER, G. Kishan Reddy chu a chenna In ah hmuin Mizoram mamawh thil pawimawh chi hrang hrang te an thlen a. DoNER Minister chuan Covid dona atan leh District hrang hrang Hospital te tihchangtlunna atana hman turin cheng vbc. 38 pek thuai a nih tur thu sawiin, Mizoram-ah Oxygen Plant pahnih bun a nih tur thu leh Mizo-ram-a Covid dotu te tanpui turin Central Team tirh thuai an ni ang, a ti bawk. Hei bakah hian Myanmar atanga inhumhimna zawnga Mizoram a châm mekte pawh Covid vaccine pek vek tur an nih thu leh hei hi anmahni Myanmar mite tan chauh ni lovin, India khua leh tuite himna atan pawh a pawimawh thu a sawi bawk.


EE sawn tur MSU in an dang

Mizo Students Union (MSU) District Hqrs. Kolasib chuan Er. Lalthan Zuala, JAG, EE National Highway Division-III, Thingdawl chu EE (Works) SE, Western Circle Office, Aizawl-ah sawn a ni tih sawiin, Kolasib District in kawngpui tha an neih theihna atana tha leh zung a tak taka sengtu EE chhan leh vang mumal awm lova sawn-chhuah a ni ta mai chu hriatthiam harsa leh pawi an tih thu an sawi a. He Transfer Order hi sut leh a nih theih nan Chief Minister hnenah pawh ngenna an thehluh thu sawiin, he an ngenna hian awmzia a neih loh avangin nimin khan Er. Lalthan Zuala Joining report pe tur chu an dang tih an sawi a, thu leh a awm hma chuan an dinna ngai ah an ding reng dawn tih an sawi bawk.


Tuirial-a tla la zawng zel

Inrinni zan zanlai vel-a Tuirial lui-a chesual Lalramvula (32) S/o Lalrinzela, N. Serzawl khua chu nimin thleng khan mi tlawmngai ten an la zawng zel a, Tui tla zawng tur hian National Disaster Response Force (NDRF) te chah niin Vawiin hian a chetsualna nia hriat hi an thlen beisei a ni.


BJP Candidate tur puang

BJP Mizoram Pradesh chuan Tuirial bial-a Assembly bye-election neih turah K, Laldinthara, BJP State Spokesperson chu an Candidate tur a nih thu nimin khan Aizawl-a an Office-ah an puang a. BJP Candidate tur puanna inkhawm ah hian an President Vanlalhmuaka chuan an Candidate chu Central Sawrkar nawr turin Tuirial Bial mipui ten an thlantlin ngei a beisei thu a sawi a. Tunhnai lawkah Mizoram Chief Minister, Zoram-thanga'n Tuirial Bial mipui te vau in, MNF an thlan tlin loh chuan hmasawnna in a thlenloh tur thu a sawi nia sawiin, Chief Minister chu Democracy kalphung hre lo-ah a puh bawk.


PC in Candidate nei dawnlo

Peoples' Conference (PC) Party chuan Tuirial bial-a Assembly bye-election neih tur ah Candidate an nei dawnlo tih nimin khan thu-chhuah siamin an tarlang a, Candidate zingah thlawp bik an nei dawnlo tih pawh puangin, an Party mipuite chu ngaihtuahna fim hmanga kan ram leh bial tana mi tha ber tura an ngaih thlang tur leh Vote thlak theuh turin an ngen bawk. Hei bakah hian PC Party chuan an Party Treasurer atan HK. Liansawta chu thlan a ni tih pawh sawiin, amah hi Ex-Servicemen niin PRISM Party-ah pawh Treasurer ni thin a nih thu an sawi bawk.


Dy. Speaker in tlangzarh

Mizo Students’ Union (MSU) Sub-Hqrs. Tlungvel in Tlungvel khua leh a chhehvela Mizo pipute hmun hlui, sulhnu an lo neih tawhna te en theih tura Documentary Film an siam chu nimin khan bialtu MLA leh Assembly Deputy Speaker, Er. Lalrinawma chuan a Office-ah a tlangzarh a, Deputy Speaker chuan ram leh hnam rohlu te hi hlut leh humhalh a pawimawh thu a sawi bawk.


Tuirial Bial-ah ZPM in Campaign an hawng

Tuirial Bial-a Assembly bye-election neih tur atan ZPM Party chuan nimin khan Lungdai leh Kawnpui-ah Campaign hawnna hun an nei a, he hunah hian an candidate K. Laltlanmawia chuan thlantlin a nih chuan MLA hlawh leh MLA  Fund zawng zawng a bo a bang awm lovin Tuirial bial tan a hman tur thu a sawi a ni. He hunah hian ZPM Leader Lalduhoma pawhin thu sawiin MNF in Campaign hawnna an neih ah Chief Minister chuan Chief Minister sawi atana mawilo thu tam tak a sawi nia sawiin, “Tuirial by-election chungchang sawi lovin keima mimal min bei vak mai,” a ti a. “Serchhip bial chu bial reh tak niin an sawi a, reh dik tak chu anmahni MNF te hi an ni,” a ti bawk.

Comments

Popular News (Last 30 Days)