Ni 3 awh tur training tan

Serchhip District chhunga Village Council hrang hrangte tana buatsaih ni thum (3) chhung awh tur Village Disaster Management Committee din dan leh Plan siam dan tur chungchang zirhona chu nimin khan Serchhip DC Conference Hall-ah neih tan a ni.

He zirhona nimin a neih tan hi District Bawrhsap Kumar Abhishek IAS chuan hmanpuiin Village Disaster Management Plan siam pawimawh zia te, chhiatna lo thleng palh theih hmachhawn tura a theih ang anga inbuat-saih lawk a pawimawh zia te a sawi a. Chhiatna a lo thlenin Village Council tin ten mahni bialtu Zonal Officer theuhte hrilh hriat nghal vat thin tur a nih thu sawiin, mithiamten zirtirna chi hrang hrang an pekte chu uluk tak leh hriatchian ngei tuma ngaithla turin he Training a tel te chu a chah a ni.

Nimin-a Training hawnna hun hi SDO (Sadar) C. Laltleipuii chuan kaihruaiin Village Council hrang hrang aiawhte Training leh Sensitization Programme chu COVID-19 hri vanga hun engemaw chen ngaihchan a nih thu a sawi a, tun tumah hian SOP tha taka zawm chungin Serchhip District chhunga Village Council 54-a member pahnih theuhte chu nitin mi 36 zelin ni thum chhung training pui turin ruahmanna an siam thu a sawi a ni.

He Training-ah hian chhiatna lo thlen thulha VC leh Village Disaster Management Committee te mawhphurhna leh Committee din dan bakah chhanchhuah leh chhawmdawlna hna chi hrang hrang thawh dan te mithiam thlan bik ten an zirtir a ni.