Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Mizoram-ah hri kai leh enkawl dam pung zel

Pathianni khan Mizoram-ah Sample 1529 enfiah niin COVID-19 hri kai mi 443 hmuhchhuah a ni a, Sample enfiah atanga chhut chuan za zela 28.97 te chuan hri an kai a ni.

Pathianni khan ZMC-a RT-PCR Laboratory-ah Sample enfiah awm lovin Fluorescent Immunoassay (FIA) Test hmangin Aizawl District-ah Sample 94 enfiah a ni a, heng atang hian hri kai mi 7 hmuh niin an vai hian Aizawl khawpui chhung ami te vek an ni. Pathianni khan Khawzawl leh Lunglei District-a TrueNat Laboratory-ah Sample 22 enfiah ni bawkin heng atang hian hri kai mi 8 hmuh an ni bawk a, an vai hian Khawzawl District-a hri kai hmuh te an ni.

Rapid Antigen Test hmangin Pathianni khan Mizoram-ah Sample 1413 enfiah niin Siaha, Khawzawl leh Hnahthial District tihloh District dang zawngah Sample enfiah a ni a, heng atang hian hri kai mi 428 hmuh ni bawkin an zinga 336 te chu Aizawl District atanga hri kai hmuh te an ni a, Veng leh khua 64 ami te niin Chaltlang-ah 27 leh Salem Veng-ah hri kai mi 23 hmuh an ni. Champhai District-ah hri kai mi 29 hmuh ni bawkin Lunglei District-ah 23, Serchhip District-ah 21, Kolasib District-ah 10, Mamit District-ah 4, Saitual District-ah 3 leh Lawngtlai District-ah hri kai mi pahnih hmuh an ni bawk.

Mizoram-a COVID-19 hri kai enkawl zingah dam awm belh zelin nimin khan tlai dar 5:00 thlengin hri kai mi 538 enkawl dam an ni ve leh bawk a, heng hri kai enkawl dam te hi District 8 ami te niin heti hian nimin tlai dar 5:00 thlenga Mizoram-a hri kai hmuhchhuah chu 98,175 an tling ta a. An zinga 83,123 te chu enkawl dam ni tawhin hei hi hri kai hmuhchhuah atanga zaa 84.67 niin tunah hian hri kai enkawllai 14,726 an la awm mek a ni. Tun dinhmunah Mizoram-a District 11 zingah Khaw-zawl tihloh District dang zawngah hri kai enkawllai an awm a ni.

Hetihlai hian Mizoram-a COVID-19 hri kai zingah nunna chan an la awm belh zel a, nimin zing dar 4:40 khan LK. Hmanga (52), Saiphai khua chu ZMC-ah boralin nimin zing dar 7:15 khan K. Singliana (78), Zonuam chu ZMC-ah a boral ve leh bawk. Nimin zing dar 8:30 khan Chhawnveli (67), Hnahthial chu DCHC Lunglei-ah boralin zing dar 8:45-ah Lalhuapzaua (73), Dinthar Aizawl chu a boral ve leh bawk a, chawhma dar 11:15-ah Lalremruata (46), Zemabawk chu boral ve lehin chawhnu dar 1:40-ah H. Lallungkhami (67), Tanhril chu COVID-19 vangin an chenna In ah a boral bawk a, hemi hnu chawhnu dar 2:00 khan Lalrochhingi (71), Kulikawn chu a boral bakah zan dar 6:10 khan Tialhnemi (81), Tlangpui, Farkawn-a raltlan chu a boral ve leh bawk a ni. Heti hian nimin bik khan Mizoram-ah COVID-19 hri kai mi 7 zet boral an awm a, heng mite nen hian Mizoram-a hri kai zingah mi 327 zet an boral tawh bawk a ni.

Comments

Chhiar Hlawhte